Compostela, 16 de febreiro do 2021 – A Xunta anunciou onte que as restricións seguirán nun nivel “máximo” con fin de “consolidar a melloría alcanzada nas últimas semanas”
As restricións anunciadas onte polo presidente da Xunta, Alberto Núñez Feijoo, deixan sen embargo seis portas abertas a outras tantas áreas sociais.
Na educación `ponse data, 22 de febreiro, ás clases presenciais en ensinanzas especiais como os conservatorios de música e danza, e escolas de idiomas. Só queda fora de esta medida “a práctica de instrumentos de vento e de canto que os expertos piden aprazar de momento”. A Universidade tardará un pouco máis xa que volverá ás clases o 1 de marzo e previamente farase un cribado.
Desde este mércores o comercio recupera o horario habitual. O aforo mantense nun 50% pero mantense tamén o peche dos centros comerciais na fin de semana.
En deporte engádese ao deporte ao aire libre, que xa estaba permitido, a reapertura das instalacións deportivas ao aire libre para a práctica deportiva individual; e retómase, tamén, a competición federada autonómica.
Apertura de restauración nas áreas de servizo
Despois da polémica sobre a necesidade dos transportistas de dispoñer de lugares onde comer Feijoo anunciou a apertura do interior dos restaurantes das estacións de servizo nas vías de altas prestacións. Os transportistas en calquera caso terán que acreditar a súa condición coa tarxeta profesional e comer sós.
Apertura nas residencias e na cultura
Por último, Feijóo anunciou que se volverá a permitir a actividade cultural coas seguintes limitacións: retomarase a actividade en bibliotecas, arquivos, museos, salas de exposicións e outros equipamentos culturais, cun 30% de capacidade máxima permitida; e tamén se retomarán as actividades en cines, teatros e auditorios, coa mesma limitación de aforo.
No que atinxe ás residencias, o titular da Xunta confirmou que naquelas nas que se completase o ciclo da vacina hai dez ou máis días, as visitas pasarán de ser unha por semana a tres por semana, con dous familiares de referencia. E, no caso dos centros de discapacidade, retomaranse as saídas a fin de semana, sempre que pasasen 10 días desde que o usuario recibise a segunda dose da vacina.
