Compostela, 2/03/26 – O concello de Santiago aprobará hoxe na Xunta de Goberno Local continuar coa licitación do servizo de transporte urbano na cidade. O proceso suspenderase cando se presentaron cinco recursos ante o Tribunal de Contratación de Galicia.
O Tribual non admitiu a trámite tres de eses recursos e os outros dous foron desestimados. O goberno municipal aprobará tamén a ampliación do prazo de presentación de ofertas en 8 días, ata o 18 de marzo, co obxectivo de que se presenten a maior cantidade de empresas posibles.
A alcaldesa, Goretti Sanmartín, cualificou de “boa noticia” que o TACGAL resolvera os cinco recursos do transporte, dándolle a razón ao Concello en todos e cada un deses casos. O concelleiro de Mobilidade, Xan Duro, recoñeceu a satisfacción do Goberno polas resolucións do TACGAL, “que cremos que confirman que estes son uns pregos ben armados, nos que tivemos en conta o acontecido noutros procedementos similares, diferentes resolucións do Tribunal de Contratación e da ONE e mesmo sentenzas xudiciais”.
O TACGAL non tivo en conta ningunha das cuestións apuntadas polas recorrentes, nin total nin parcialmente, e nese sentido Xan Duro lembrou que na anterior licitación do transporte en Santiago, dos cinco recursos presentados diante do Tribunal de Contratación, tres foran estimados parcialmente.
En canto aos contidos dos recursos, o concelleiro de Mobilidade apuntou que se referían a cuestións moi diversas, como os criterios de valoración de ofertas ou os estudos económicos.
Tamén se cuestionaban esixencias incorporadas aos pregos como a obrigatoriedade de que as empresas licitadoras acrediten ter prestado servizos similares en ámbitos territoriais de máis de 75.000 habitantes nos tres anos anteriores á licitación; que faciliten 67 autobuses provisionais para prestar o servizo ata a dispoñibilidade da frota definitiva, ou o requisito de ofertar vehículos de gas natural.
