Brión, 28 de febreiro do 2022 – O Balneario do Tremo en Brión acarrea un conflito laboral que provocou estes días unha protesta dos traballadores diante das instalacións.
Según as informacións do sindicato Comisións Obreiras, o Balneario pechou a comezos do ano 2021 no marco dun procedemento concursal previo á liquidación da sociedade. A empresa contaba en ese momento con trinta traballadores.
De Balneario de Compostela a Balneario do Tremo
Antes do peche o Balneario levaba o apelido “de Compostela”. Tras o peche do proceso de liquidación, no mes de maio, rexístrase a nova sociedade Hotel Balneario do Tremo xa no mes de xuño.
A nova empresa faise cargo das instalacións pero contrata só unha parte do persoal que previamente había, sen subrogarse nas súas condicións de traballo.
Protestas
Ducias de traballadores e traballadoras concentráronse no mediodía do sábado fronte ao Balneario do Tremo. Entre consignas como «Balneario de Ramón, queremos solución» ou «queremos traballar, non emigrar», esixiron que a actual dirección do balneario readmita todo o persoal con que contaba a empresa ou que os indemnicen por despedimento improcedente.
Segundo informa CCOO, sindicato que asesora os traballadores, a empresa, propiedade de Ramón López Casal, comparte dirixentes coa anterior, entre eles o propio Ramón López Casal.
CCOO apoia os traballadores e traballadoras nas súas reivindicacións, esixindo que a nova sociedade readmita a totalidade do persoal ou ben proceda ao pagamento da indemnizacións correspondentes a un despedimento improcedente.
