Bisbarra, 28 de abril do 2022 – Os concellos pdderán destinar parte dos cartos do Plan único da Deputación a compensar a suba dos prezos da luz e dos carburantes.
O pasado mes de marzo aprobábase o POS + cun investimento nos concellos de máis de oitenta millóns de euros. Esta partida, destinada en principio a obras e investimentos nos 93 concellos da provincia, poderá destinarse ás facturas da luz e dos combustibles.
O presidente da Deputación, Valentín González Formoso, explica que “Estes gastos disparáronse nos últimos meses e supoñen un serio problema económico non só para as familias e as empresas, senón tamén para os concellos, que cada vez deben destinar máis recursos para pagar as facturas de luz e carburantes”.
Formoso engade que .”Unha vez máis, o Plan Único demóstrase como unha ferramenta útil e eficaz para atender as necesidades dos municipios coruñeses, que son os que deciden o destino dos fondos en función das súas necesidades”.
O vicepresidente e responsable da área de Plans, Xosé Regueira, afirmou que a Deputación posibilita que todos os concellos da provincia teñan capacidade de investimento e que sexan capaces de aprobar os seus investimentos sabendo sempre cal é a achega económica da Deputación cada anualidade, “mais tamén procuramos estar sempre atentos ás necesidades puntuais e ás dificultades económicas que estresan as arcas municipais para darlle saída”.
“O Plan Único demostra a súa utilidade, eficacia, e tamén o seu dinamismo, ao permitir que este ano puntualmente os concellos fagan fronte á factura enerxética para servizos básicos como poden ser o alumeado público ou infraestruturas como polideportivos ou piscinas. Deste xeito, o gasto enerxético súmase ao criterio de investimento en obras financieiramente sostibles”, afirmou.