Compostela, 8 de xuño do 2023 – A praza de Mazarelos acollerá un ano máis o Festival de San Xoán con actividades de todo tipo e unha nova imaxe gráfica.
Desde as cinco da tarde e ata as dez da noite Mazarelos será o punto central da Feira do san Xoán. Un evento que propón maxia, música, queimada e mesmo un espazo “palleiro” para os máis pequenos.
Unha das citas máis celebradas, das asociadas a esta festa, e o “Tren Cacharelo” que circulará de balde toda a tarde, parando nos barrios con cacharelas máis significadas e tradicionais. Un xeito de descubrir aqueles espazos nos que ao longo do tempo mantiveron esta tradición.
O Tren estará en circulación de 17.00 a 22.00 horas, con saída ás horas en punto desde a parada principal no CGAC, e terá paradas sinalizadas na avenida do Burgo das Nacións, na Carballeira de San Lourenzo e na avenida de Xoán Carlos I.
O Festival conta este ano cunha nova imaxe que quere animar a participar nesta Festa con tanto arraigamento en Santiago, xa sexa no propio Festival de San Xoán como en calquera das múltiples cacharelas que se celebran por todo o concello.
O programa detallado do Festival, que entre outras actividades inclúe paseos botánicos na procura das herbas de San Xoán, obradoiros, maxia, música en vivo e queimada, darase a coñecer a próxima semana.
A Festa do San Xoán é anterior á chegada do cristianismo pero como outras moitas pasou de estar vinculada ao solsticio de verán a relacionarse cunha data do santoral. Nos últimos anos os concellos fixeron un esforzo por recuperar a tradición e comezaron a desenvolver actividades como a recollida das herbas e organizar e apoiar as cacharelas.
