Compostela aprobará na Xunta de Goberno do luns 26 esta declaración como zona residencial tensionada para a continuación remitila á Xunta de Galicia.
Compostela dou o penúltimo paso para converter a cidade en “zona residencial tensionada”. O último será a aprobación en Xunta de Goberno, o uns 26, e a presentación da solicitude ante a Xunta de Galicia para que a aprobe definitivamente. A mesa sectorial consensuou o xoves os últimos matices da petición.
Presidida polo concelleiro de Urbanismo, Vivenda e Cidade Histórica, Iago Lestegás, esta segunda reunión da mesa sectorial da vivenda contou coa participación preto dunha vintena de entidades e representantes do sector.
O encontro serviu para dar forma definitiva o proxecto de Plan de medidas correctoras que acompañará á solicitude de Santiago como zona de “zona residencial tensionada”. Lestegas confirmou que aquí rematan os trámites e actuacións previas e que en próximos días o Concello remitirá a documentación completa desta solicitude tras a súa aprobación en xunta de goberno local.
Segunda comisión sectorial de vivenda
Esta segunda comisión tivo como obxectivo rematar os traballos previos. O concelleiro de Urbanismo decidiu convocar por dúas veces esta comisión, aínda que unicamente era requisito facelo unha vez, co fin de poder incorporar suxerencias ao documento definitivo do Plan de medidas correctoras.
“O acceso á vivenda é un dos grandes desafíos do noso tempo, tamén é unha das principais preocupacións da xente e no Concello de Santiago consideramos prioritario actuar para abordar a crise da vivenda”, explicou en declaracións aos medios Iago Lestegás, quen indicou tamén que “todas as medidas que está implementando teñen o obxectivo común de garantir o dereito á vivenda”.
Lestegás explicou que as medidas teñen dúas liñas de actuación: mellorar o aproveitamento do que xa existe e ampliar a oferta de vivenda a prezos razoables. Neste sentido, as liñas foron expostas na reunión desta mesa, que é “o paso previo á solicitude formal da declaración de zona de mercado residencial tensionada”, unha declaración que “vai servir para conter a escalada do prezo do alugueiro e tamén para acceder a fondos estatais específicos para políticas de vivenda”.
Medidas correctoras
Na reunión, o concelleiro de Urbanismo e Vivenda deu conta das principais liñas que recolle o Plan de medidas correctoras, que inclúe un gravame fiscal ás vivendas baleiras con carácter permanente. No que ten que ver coa vivenda baleira, Santiago aposta por establecer un marco de cooperación entre o Concello e o IGVS para reforzar e ampliar o papel do censo de vivendas baleiras autonómico. Tamén aposta por participar no programa autonómico de mobilización de vivendas en alugueiro.
E no que ten que ver coa fiscalidade, modificarase a ordenanza fiscal para introducir bonificacións no imposto de construción, instalacións e obras (ICIO) para actuacións de rehabilitación de edificios catalogados de uso residencial. Sen saír deste ámbito, o goberno local tamén modificará as ordenanzas fiscais municipais para introducir bonificacións no IBI e no ICIO para vivendas de promoción pública, vivendas de protección autonómica e cooperativas de vivenda en cesión de uso.
O plan de medidas tamén promove a ampliación da oferta de vivenda protexida (de diferentes tipos), ao respecto do que o concelleiro lembrou que alén da nova construción, tamén se pode ampliar a través da rehabilitación. Neste sentido, o propio Concello iniciará un programa de rehabilitación integral de inmobles de titularidade municipal e a primeira actuación será a rehabilitación de cinco edificios en estado de ruína ubicados na rúa de Caramoniña e cualificados como equipamento público asistencial.
Outra das medidas é a incorporación de reservas de vivenda protexida no centro urbano, que ten como exemplo a recenta aprobación inicial da modificación puntual do PXOM no ámbito do antigo colexio Peleteiro (PERI-12) para priorizar o uso residencial e incorporar unha reserva importante de vivenda protexida no corazón do Ensanche compotelán.
O plan inclúe a mobilización de solo para vivenda protexida: cesión de parcelas á Xunta, constitución de dereitos de superficie sobre solo de titularidade municipal ou alleamento de solo de titularidade municipal, entre outras. Tamén indicou que o Concello está a implementar varias medidas administrativas co obxectivo de reducir o prazo medio de tramitación de licenzas de obra (como a supresión de avais nas licenzas de obra con orzamentos inferiores a 100.000 euros o a simplificación da tramitación das licenzas de obras de mellora da envolvente das edificacións existentes).
Rexistro de Soares
Iago Lestegás incidiu en que unha das liñas do Concello está centrada no “aproveitamento do parque residencial existente, a mobilización de vivenda baleira e todo o relacionado co deber de conservación e rehabilitación”, no que encaixa o Rexistro de Soares. Ao respecto, advertiu de que “o Concello de Santiago está coas actuacións previas para incluír outros seis edificios en ruínas no Rexistro de Soares” e enfatizou que “a folla de ruta do Concello en relación co deber de conservación e rehabilitación mantense”.
A preguntas dos medios sobre o caso concreto da poxa de catro inmobles (ubicados en Praciñas das Penas 5, Loureiros 14, San Roque 23 e Espíritu Santo 33), Iago Lestegás lembrou que os tres edificios para os que se pediu a paralización da poxa foron declarados en ruína en 2010 e foron incluídos no Rexistro de Soares en 2011. Entón, a propiedade recorreu á xustiza e en 2013 a decisión xudicial foi favorable ao Concello, pero “nada se fixo daquela” e “caducou” o expediente.
“O incumprimento do deber de conservación e rehabilitación ten as súas consecuencias e a consecuencia é a inscrición no Rexistro de Soares. E a consecuencia do Rexistro de Soares é a venda forzosa, como di a Lei do Solo de Galicia”, explicou Lestegás. “Isto xa se xudicializou no seu momento e o efecto que tivo é que eses edificios seguiron en ruínas”, sentenciou.
