Compostela, 25 de setembro do 2024 – Curtocircuíto concentrase para ofrecer na súa vixésima primeira edición un festival máis sólido vinculado ao mar e as profundidades oceánicas.
Fronte aos macrofestivais cun exceso de oferta, o obxectivo de Curtocircuíto é ofrecer unha experiencia máis sosegada na que o público poida asistir sen solapamentos a unha serie de propostas que alternarán sucesivamente proxeccións, charlas ou espectáculos audiovisuais ao longo das xornadas.
Este Curtocircuíto XXI concentra tamén os espazos e Teatro Principal e Sala Capitol serán os referentes do festival. O principal deixa atrás a exclusividade cinematográfica para intercalar sesións divulgativas e directos entre as proxeccións.
Unha viaxe de 20.000 leguas para a inauguración
A inauguración ofrecerá unha oportunidade única coa versión Live cinema do filme Vinte mil leguas de viaxe submarina. Trátase dun espectáculo ideado expresamente para Curtocircuíto. A formación efémera Submarina de Improvisación (con Xavier Bértolo nos teclados e sintetizadores, Paulo Pascual no theremín e Saúl Puga ao contrabaixo) musicará en directo o filme Vinte mil leguas de viaxe submarina (Stuart Paton, 1916).
A produción, baseada na obra homónima de Xulio Verne, contou cos traballos técnicos de John Ernest Williamson, quen só un ano antes desenvolvera o primeiro sistema de fotografía e filmación subacuática. Precisamente este encontro innovador entre ciencia e arte é o motivo principal para a elección deste filme e é unha das converxencias que o festival quere explorar a través de diversas actividades.
Charlas, Live AV e mesas redondas
Un total de seis Live AV, dúas charlas e unha mesa redonda compoñerán a proposta curatorial dedicada á exploración mariña. A oceanógrafa estadounidense Mae Lubetkin, o artista catalán Mario Santamaría e o físico teórico Carlos Salgado encabezarán as sesións especiais. Unha Expedición Metaturística a cargo da antropóloga mexicana Valeria Mata e o artista galego Marcos PTT descubrirá outra forma de mirar Santiago de Compostela.
Ademais deste live cinema, a temática mariña e científica completarase con espectáculos audiovisuais xa anunciados: The Dance of the Witches. Emil Saiz & Judith Adataberta ft. Jean Painlevé, comisariado por Curtocircuíto; URHO con Iván Torres, Andrés Rodrigues e Xoán-Xil; Dopo la pausa (AV) de Irene de Andrés e Javi Álvarez; CRISPR the Pattern of Life, a cargo do dúo Bromo (Paloma Peñarrubia e Azael Ferrer); e o AV inspirado no mundo dos crustáceos e dos artrópodos presentado por 33EMBYW & Joey Holder.
As Sesións Especiais terán lugar no Teatro Principal.
A programación do Teatro Principal deixa atrás a exclusividade cinematográfica para intercalar sesións divulgativas e directos entre as proxeccións.
O venres, 4 de outubro ás 18.00 h, o artista e docente Mario Santamaría (Premio Obra Miquel Casablancas, 2020) reflexionará sobre as infraestruturas submarinas para internet na súa sesión Seguir un cable e soterrarnos no mar. Santamaría, residente en Barcelona, expuxo en cidades como Stuttgart e Londres. Na súa charla en Santiago de Compostela, tratará como Internet se compón dunha serie de materiais, construcións e intervencións que se ocultan a simple vista; desde edificios anódinos no centro das nosas cidades, ata praias urbanas onde os cables submarinos que conectan países e continentes están soterrados baixo a area. Mario Santamaría propón una deriva seguindo os nosos propios datos para coñecer a infraestrutura global das telecomunicacións.
Esta sesión completarase coa proxección de Deep Down Tidal (Tabita Rezaire, 2017), un vídeo-ensaio estilo net.art, que tece narracións cosmolóxicas, espirituais, políticas e tecnolóxicas sobre a auga e o seu papel na comunicación, entón e agora. A peza aborda como esta rede de cables submarinos facilita a acumulación e expansión do poder capitalista.
O sábado 5 ás 18:00 h, a oceanógrafa, escritora e artista Mae Lubetkin percorrerá as profundidades oceánicas na súa sesión Futuros dos fondos mariños: Ciencia e ficción nas dimensións profundas. Lubetkin revelará as historias e os estudos do proxecto Seafloor Futures, realizado a través de obradoiros, co-fabricación, reconstrución 3D, animación, deseño de son, traballos escritos e unha base de datos 3D recompilada a partir do seu estudo dos hábitats mariños. Deste xeito, xéranse contrarrelatos e imaxinarios mergullados que reconfiguran a nosa relación cos mundos do fondo océano ao tempo que propoñen futuros anti-extractivos.
O traballo artístico de Mae Lubetkin dialoga e entra en tensión coa ciencia. Lubetkin, xeóloga mariña e experta en captación de imaxes submarinas, é artista residente do Thyssen-Bornemisza Art Contemporary TBA21 en colaboración con Ocean-Archive.
Tamén o día 5 de outubro, en horario de mañá, Curtocircuíto propoñerá a mesa redonda Instrumentos de Visión: metodoloxías e analoxías entre a ciencia e a fantasía. Esta sesión especial estará organizada en colaboración co Art.Lab do Instituto Galego de Física de Altas Enerxías (IGFAE) a partir da exposición Instrumentos de Visión, do artista Armin Linke e comisariada por Mónica Bello desde o Arts at CERN, que pode ser visitada ata o 21 de setembro na igrexa da USC . A actividade contará coa participación do físico teórico Carlos Salgado, director do IFGAE; Luísa Martínez, responsable de Cultura Científica de CSIC-Galicia e o investigador e artista sonoro, Xoán-Xil. A conversa partirá do traballo exposto por Linke para facer unha analoxía entre os instrumentos da visión científica e as ferramentas da visión e da filmación e, a partir de aí, afondar nas analoxías e diverxencias dos métodos de investigación artística e científica.
Expedición Metaturística
Como colofón das sesións Especiais, Curtocircuíto, en colaboración co colectivo Galiza Emocional, propón un paseo polas rúas da cidade para facer turismo do turismo. Unha deriva desde a etnografía, a escoita e o xogo da man da antropóloga Valeria Mata e do artista Marcos PTT.
Nesta Expedición Metaturística, o festival sae das súas sedes para explorar a súa propia cidade na procura deses lugares de fricción cidadá coa intención de repensar o público e aportar un gran de area na construción de novos imaxinarios urbanos e sociais para Compostela.
Venda de abonos e entradas
Hai tres tipos de abonos: para todas as proxeccións, cun prezo de 20 euros; para os Live AV (espectáculos audiovisuais en directo), cun custo de 30 euros, e o abono integral por 40 euros, que inclúe a asistencia a todas as proxeccións, concertos e experiencias audiovisuais.
As entradas para as proxeccións custan 4 €. O prezo das sesións live AV no Teatro Principal é de 8 €, e de 14 € na Sala Capitol. O acceso ás Sesións Especiais no Teatro Principal é gratuíto, previa recollida de convite.
As entradas pódense mercar tamén de forma presencial, na Zona C – Punto de Información Cultural, en horario: de martes a sábado, de 11.00 a 14.00 h e de 16.00 a 19.00 horas ademais de no Teatro Principal a partir do día 2 de setembro.
Curtocircuíto – Festival Internacional de Cinema de Santiago de Compostela está organizado polo Concello de Santiago de Compostela (Compostela Cultura) co apoio, entre outros, da Deputación da Coruña, da AGADIC e do ICAA.
