Compostela, 18 de febreiro do 2025 – A Xunta de Goberno Local de Santiago aprobou este luns o proxecto de orzamentos e chega, en principio, a última fase da tramitación.
Desde que o grupo socialista se dividira en dous, abrindo unha teórica fenda no acordo de orzamentos asinado, as preguntas sobre a súa aprobación son prato fixo nas comparecencias do goberno municipal ante os xornalistas.
Hoxe repetirase a escena xa que o concelleiro de facenda, Manuel César, da unha rolda de prensa na que os orzamentos volverán a ser protagonistas. O goberno municipal apela ao compromiso dos socialistas e engaden que Marta Abal, que xunto con Sindo Guinarte afastouse dos denominados “díscolos”, participou nas negociacións.
A aprobación de este luns
A Xunta de Goberno deu luz verde ao proxecto de orzamentos municipais para este ano que ascende a máis de 146 millóns de euros, un 2,60% de incremento con respecto ao exercicio anterior.
Esta proposta terá que ser sometida agora ao Pleno para a súa aprobación inicial. Antes hai un paso previo: a Comisión Informativa de Facenda que previsiblemente celebrase esta semana de cara á súa inclusión nunha sesión plenaria extraordinaria que tería lugar a finais de febreiro.
Na mencionada comisión poderase saber o que votan cada un dos grupos pero teñen a posibilidade de gardar ese voto para o pleno. O certo é que nin Sindo Guinarte nin Marta Abal, que son os que poderían cambiar de opinión, fixeron declaracións sobre o sentido do voto polo que todas as posibilidades existen a día de hoxe.
A voceira do Goberno municipal, Míriam Louzao, recordou na rolda de prensa que se trata dun “orzamento equilibrado” que ascende a 146.129.089,50 euros, unha cifra “que supón un 2,60% de incremento a respecto do exercicio anterior”. Tamén detallou que o gasto corrente situarase nos 130 millóns de euros e os investimentos reais estarían en torno aos 13 millóns. “Prevese unha operación de crédito por importe de 2.517.539,82, con efecto neutro no endebedamento municipal”, detallou a concelleira.
