Compostela, 20 de febreiro do 2023 – Este martes celébrase o Día Internacional da Lingua Materna e a Xunta ven de presentar o xogo “Ti es a chave da primavera” para conmemoralo.
Trátase dunha colaboración con Ronsel de Ideas que da como froito un xogo familiaren forma de conto dixital interactivo que ten como obxectivo concienciar sobre a transmisión da lingua galega como unha chave para o futuro.
Os contidos deste proxecto, que inclúen o conto dixital “Ti es a chave da primavera”, así como un amplo abano de actividades interactivas adicionais relacionadas, xa están dispoñibles totalmente de balde no Portal da Lingua Galega .
Con motivo da súa difusión, o secretario xeral de Política Lingüística, Valentín García, indicou que estes contidos, xunto con outros que se presentarán proximamente, “veñen a enriquecer o repositorio de recursos destinados á infancia e á transmisión interxeracional do galego, tanto na familia como no ensino”.
García agradeceu o seu traballo a Roberto Noguerol, de Ronsel de Ideas, empresa responsable do proxecto especializada na elaboración de materiais e contidos divulgativos nas áreas de cultura, educación e lingua.
Co lema ‘Mil Primaveras máis’
Pensado para rapazada da Educación Primaria que está nun momento formativo moi importante, tanto desde o punto de vista da competencia coma do asentamento lingüístico, “Ti es a chave da primavera” inclúe un conto dixital e recursos interactivos adicionais en tres áreas, tituladas Dos xograres ao trap, Un idioma para percorrer o mundo, e Unha lingua de récords.
Tomando como fío condutor o lema Mil Primaveras máis, os materiais teñen o obxectivo de facerlle ver aos nenos e nenas que eles son unha peza fundamental do futuro do idioma, ao tempo que se quere reforzar e concienciar as familias na idea de que a transmisión da lingua é unha chave para o futuro dos seus fillos e fillas.
Programa Tece Redes en galego
Ti es a chave da primavera forma parte da iniciativa TeCe Redes en galego da Consellería de Cultura, Educación, FP e Universidades é un repositorio de proxectos dixitais e servizos esenciais, creado ao abeiro do Fondo de Proxectos Culturais Xacobeo 21-22, co fin de fornecer un programa de dinamización lingüística e de transmisión xeracional dirixido ao público infantil e xuvenil, nas diversas interaccións verbais e escritas da súa vida cotiá e coas súas familias.
No marco deste programa realizáronse tamén ducias de actuacións teatrais, musicais ou exposicións que involucraron milleiros de persoas e que foron froito das propostas de profesionais do sector cultural, creativo e artístico galego.
