O grupo IDEAHS e o proxecto ARSOGAL da USC lembran os 50 anos da desaparición do Edificio Castromil presentando as imaxes da súa recreación virtual
Este venres 31 de outubro, ás 18:00 h, o Auditorio do Museo do Pobo Galego acollerá o evento “Virtualizando o Edificio Castromil 50 anos despois da súa demolición”. O evento lembra a data da demolición, en setembro de 1975, tras un intenso proceso de denuncia iniciado desde o Colexio Oficial de Arquitectos de Galicia (COAG).
A iniciativa forma parte do proxecto “Arquitecturas soñadas. Proyectos fallidos y pensamiento utópico en la historia de la arquitectura en Galicia” (ARSOGAL). O acto estará conducido por Santiago Rodríguez Caramés e Paula Franjo Calvo e intervirán tres dos redactores do anteproxecto de rehabilitación do edificio, os arquitectos Carlos Almuíña, Xosé Lois Martínez e Xosé Manuel Casabella, que, xunto aos xa falecidos Ramón Baltar e Xosé Bartolomé, elaboraron no 1975 o proxecto para salvar o edificio situado na Praza de Galicia.
A proposta para o edificio Castromil pretendía conservar o inmoble e dar uso público e colectivo ao edificio cunha intervención que conservaba a idea inicial de aparcadoiro subterráneo e unha ampliación de edificio multiservizos con sala de concertos, , oficinas municipais e uso hostaleiro.
O proxecto do Edificio Castromil nin sequera chegou a ser debatido, pero foi agora recuperado a través dunha virtualización en 3D realizada polo Centro Infográfico Avanzado de Galicia, representado no acto por Carlos Paz de Lorenzo, en colaboración cos investigadores de ARSOGAL.
As imaxes, que recrean tanto o edificio desaparecido como a proposta non realizada, permitirán revisitar este episodio clave na historia do patrimonio urbano de Santiago de Compostela. Este encontro será unha oportunidade para reflexionar sobre os vínculos entre arquitectura e memoria, e para coñecer de primeira man os avances tecnolóxicos que permiten recuperar espazos desaparecidos e reimaxinar o seu lugar na cidade contemporánea, desta volta en memoria dun edificio que pervive no imaxinario cidadán e que se considera como unha das decisións urbanísticas máis polémicas do século XX en Compostela.
