A Plataforma de Veciñal de afectados polo plan para o solar de Peleteiro convoca unha asemblea a vindeira semana para falar das posibles alegacións.
A Plataforma Veciñal que congrega aos afectados polo plan presentado para a parcela do antigo colexio Peleteiro ven de publicar unha convocatoria para falar das posibles alegacións a presentar. Será o vindeiro luns, as oito e media da tarde, no Centro Socio Cultural do Ensanche.
Xunto á convocatoria a Plataforma publica un texto no que describe a súa opinión sobre o plan presentado e as demandas que eles teñen para a parcela. Estes veciños consideran “un erro histórico insistir nun modelo urbanístico tan criticado e cuestionado como é o Ensanche compostelá que lonxe de mellorar a nosa calidade de vida, do comercio local e dos visitantes, o que vai facer é aumentar os problemas actuais”.
Indican ademais que a “única explicación para que se insista na pésima proposta aprobada é simplemente especulativa cuxo negocio vai xerar unhas plusvalías astronómicas e o enriquecemento duns poucos a conta da veciñanza compostelá”.
A Plataforma di que a urbanización da parcela de Peleteiro é urxente pero que tamén o é a dinamización da zona nova de Compostela. En este sentido poñen sobre a mesa unha serie demandas.
Reclaman algo amplamente debatido nos últimos anos como a necesidade de converter parte do espazo nunha praza pública aínda que piden que estea “ben orientada para favorecer a socialización e esparcemento da veciñanza”.
Outra das demandas recorrentes da veciñanza en xeral é a dun “centro de día con capacidade suficiente para atender a demanda crecente”. Piden ademais “un espazo suficientemente amplo que posibilite actividades de conciliación familiar”.
Outra das demandas é un “centro de exposicións e actividades de dinamización comercial para o comercio local e un salón de actos que posibilite actividades culturais que entren na programación cultural da cidade cun orzamento propio”.
Vivenda protexida
A Plataforma e moi crítica co goberno municipal e considera que o anuncio de vivenda protexida “é un enorme bulo que lle pasará factura ao Goberno Municipal xa que só trata de disfrazar un enorme pelotazo urbanísco cuns xigantescos beneficios e onde a nosa alcaldesa mais ben parece a comercial da empresa”.
Non só iso, a Plataforma considera que o outorgamento de esa vivenda protexida “está en mans da empresa e ela sabe ben como facer para filtrar ós propietarios que teñan dereito a ela. Hai sobrados exemplos en España”.
Estes veciños rematan o escrito considerando que “se o Goberno Municipal non rectifica, a veciñanza non lle vai perdoar esta traizón e terá que explicar porque pon os intereses da empresa construtora por diante da veciñanza como así fixo tamén o Goberno predecesor”.
