Compostela, 29 de febreiro do 2024 – O concello de Santiago de Compostela escenificaba onte a sinatura do V Pacto Local polo Emprego coa participación de distintos estamentos da cidade.
No acto participaron, ademais do concello de Santiago de Compostela, a Universidade, Cámara de Comercio, a Asociación Empresarial Polígono do Tambre, Hostelería Compostela, Hostalaría.gal, a Plataforma polo Emprego e os sindicatos UXT e Comisións Obreiras.
O concelleiro Xan Duro, en substitución de María Rozas, cualificou o documento asinado como “Unha folla de ruta para avanzar cara o modelo produtivo e laboral que queremos, e para facelo da man e de maneira colaborativa entre todos os axentes implicados, comezando polo propio Concello”.
O V Pacto Local polo Emprego de Santiago de Compostela toma o relevo do aprobado en 2015 e que estivo vixente ata 2020. Contén tamén outras estratexias como a Axenda Urbana 2030 e ten como obxectivo “avanzar cara un mercado de traballo que ofreza oportunidades laborais de calidade para todos e todas, asentar as bases para implantar unha actividade económica produtiva e sostible, e impulsar políticas activas de emprego que integren os recursos públicos procedentes das diferentes administracións”.
Liñas estratéxicas
O pacto asinado en Compostela desenvólvese en torno a catro liñas principais. Apoiar as persoas para o emprego, impulsar o desenvolvemento económico e o emprego, fomentar a transición do modelo produtivo cara a sostenibilidade, e fortalecer o traballo en rede dos axentes públicos e privados.
Estas liñas concrétanse en 78 metas a alcanzar. O concelleiro Xan Duro explica que estas atenden a diferentes cuestións relacionadas co mercado laboral, “e nas que cobran máis importancia a conciliación, a igualdade, a sostenibilidade, o fomento da economía social e a economía verde, ou a aposta pola reindustrialización e a dixitalización; en liña coa Axenda Urbana 2030 e coas estratexias e normativas aprobadas nos ámbitos estatal e europeo”.
O V Pacto Local polo Emprego pon ademais o foco nos colectivos vulnerables, como o das mulleres, inmigrantes e persoas maiores de 45 anos “que tal e como se recolle na diagnose do propio Pacto requiren de políticas específicas por seren os que teñen maiores dificultades para o acceso e para o mantemento do emprego”.
O V Pacto Local polo Emprego foi asinado, ademais de polo concelleiro de Promoción Económica en funcións, Xan Duro; por Pilar Murias Fernández, vicerreitora de Estudantes e Cultura da Universidade de Santiago; María Pais Fajín, presidenta da Cámara de Comercio; José Fernández Alborés, presidente da Asociación da Área Empresarial do Tambre; Sara Santos, presidenta de Hostelería Compostela; Joaquín García Gutiérrez, Secretario Xeral de CCOO Santiago – Barbanza; Marisa Rodríguez Vázquez, Secretaria Xeral da UGT Compostela – Barbanza e Miguel Fernández Blanco, Presidente da Asociación Plataforma polo Emprego. Desculpou a súa presenza Lois Lopes, presidente da Asociación Hostalaría.gal.
