A sesión Nerd Nite desenvolverase o día 29, ás 20.00 horas, na Nave de Vidán e tratará as historias e os mitos sobre a Facultade de Dereito da USC
A Nerd Nite do mes de abril porá o foco na Facultade de Dereito e nas historias e mitos que alberga este centro da Universidade de Santiago de Compostela, a USC.
Na sesión participarán José María Miranda Boto, catedrático de Dereito do Traballo e da Seguridade Social da USC; Belén Trigo García, profesora de Dereito Civil da USC; e Carlos Lema Devesa, catedrático de Dereito Mercantil e discípulo de Carlos Fernández-Nóvoa, en cuxa figura profundará.
A cita coa Nerd Nite será, como nas ultimas ocasións, na Nave de Vidán a partir das oito da tarde do vindeiro 29 de abril.
O profesor Miranda Boto percorrerá, na súa intervención, as celebridades que pasaron pola Facultade de Dereito. A seguir, Belén Trigo García pronunciará o relatorio titulado ‘Do batallón universitario e a Casa da Troia ás carpas douradas e a IA: outra historia de Dereito’.
Para rematar esta Nerd Nite de abril, Carlos Lema Devesa deterase no legado de Carlos Fernández-Nóvoa Rodríguez e lanzará a pregunta ‘Por que hai tantos cracks en mercantil da USC?’
Nerd Nites
As Nerd Nites, organizadas polo catedrático da USC Jorge Mira Pérez, son conversas divulgativas nas que especialistas de diferentes ámbitos dialogan co público das disciplinas que os apaixonan fóra do ámbito académico, nun ton distendido e en horario nocturno.
As Nerd Nites naceron hai anos en Estados Unidos, unha proposta orixinal á que se sumou Santiago de Compostela en 2012, sendo a primeira cidade española en facelo.
