Compostela acollerá a próxima semana a xornada “O fío verde”, na que unha vintena de produtores locais reuniranse con restauradores e empresas de catering
O Xeodestino Terras de Santiago quere dotar aos restaurantes dunha materia prima ecolóxica e de quilómetro cero. O obxectivo de esa gastronomía é converterse no eixe central da promoción turística do territorio.
O primeiro paso será a xornada “O fío verde”, unha acción de promoción turística organizada polo Xeodestino Terras de Santiago e que terá lugar a próxima semana en Compostela.
“O fío verde” reunirá a unha vintena de produtores locais de horta ecolóxica, leite, queixo, pasta fresca e distintos produtos cárnicos con restauradores e empresas de catering que se atopan na área de influencia do Xeodestino Terras de Santiago.
A intención é que poidan incorporalos á súa lista de provedores. Uns emprendedores e emprendedoras dos municipios que integran este xeodestino: Ames, A Baña, Boqueixón, Brión, Negreira, Padrón, Rois, Santa Comba, Teo, Val do Dubra e Vedra.
“Levamos a terra no noso nome, por algo somos o Xeodestino Terras de Santiago. Unha terra vinculada non só a nós, senón tamén aos nosos devanceiros. E con esta iniciativa estamos intentando recuperar uns sabores que parecían esquecidos, aqueles dos nosos avós e avoas porque estamos convencidos de que a súa frescura, a súa autenticidade e a súa calidade constitúen un atractivo innegable e unha das fortalezas da nosa proposta turística ao visitante”, explican dende a organización.
A xornada “O fío verde” está organizada polo Xeodestino Terras de Santiago en colaboración co GDR Terras de Compostela e Slow Food Compostela. Terá lugar a próxima semana nun establecemento hostaleiro compostelán e agárdase contar tamén coa asistencia dos concelleiros e concelleiras de turismo dos once municipios que integran este xeodestino.
