Compostela, 27 de febreiro do 2020 – A terceira edición do Festival Rosalía terá lugar un ano máis en Compostela, na Praza de Cervantes e no Museo do Pobo Galego, este sábado 29 de 11 a 22 horas.
O festival Rosalí acollerá como nas anteriores edicións unha feira de produtos rosaliano que se complementa cun pasarrúas rosaliano teatralizado a cargo dos Quinquilláns; un obradoiro de regueifa rosaliana; a interpretación de Caldo de Gloria da man de Rilo e Penadique; a representación no Museo do Pobo do Galego da obra de teatro Rosalía; a actuación de Marina Oural e Chefa Alonso co espectáculo Rosas Negras; e finalizará cunha mostra de regueifa rosaliana e o concerto de Tino Baz, co seu disco “Si cantan, es ti que cantas….”. O Festival está organizado pola Área de Cultura da Deputación da Coruña e conta coa colaboración do Concello de Santiago de Compostela e do Museo do Pobo Galego.
Por en valor a Rosalía
Será unha xornada para “pór en valor a obra de Rosalía de Castro” como dixo o responsable da Área de Cultura da Deputación da Coruña, Xurxo Couto, na presentación do Festival que tivo lugar na libraría Couceiro de Santiago de Compostela. Esta será a terceira edición deste festival, que nesta edición de 2020 “cambiou a data de celebración para axustalo ás datas do día de Rosalía”, cuxo aniversario se celebrou o luns 24 de febreiro.
Acompañando a Xurxo Couto, na rolda de presentación participaron tamén a concelleira de Urbanismo, Vivenda, Cidade Histórica e Acción Cultural de Santiago, Mercedes Rosón; o director do Museo do Pobo Galego, Manuel Vilar; e Manuel Roxo, da empresa Culturactiva, responsable da programación cultural.
Pola súa parte, a concelleira de Urbanismo, Vivenda, Cidade Histórica e Acción Cultural de Santiago, Mercedes Rosón, destacou o Festival como “un día moi feliz” e sinalou que “o legado de Rosalía vai máis alá do literario porque Rosalía deu voz ao galego e ás mulleres nun século moi complicado”.
O director do Museo do Pobo Galego, Manuel Vilar, fixo fincapé na relación de “veciñanza” que une o Museo e Rosalía e resaltou a necesidade de revisar a obra da autora e a súa actualidade, xa que é “unha obra para redefinirnos nós mesmas. O labor de Rosalía está cargado de sinais identitarios e o Museo tamén ofrece eses sinais”.
Manuel Roxo, de Culturactiva, foi o encargado de falar do programa e afirmou que a proposta cultural presentada quere amosar “unha Rosalía que mira cara ao futuro e afonda naquelas propostas que traballan nesta liña sobre a figura de Rosalía”.
