Compostela ten un problema no servizo de transporte de viaxeiros. O autobús urbano está lonxe da eficiencia pero os taxis parecen non chegar, os VTC son presuntamente ilegais e os de aluguer con condutor “alegais”.
Compostela volve ao debate sobre o servizo de taxis a raíz da denuncia do Partido Popular sobre a contratación, presuntamente ilegal, por parte do equipo de goberno duns vehículos de aluguer con condutor para unha reunión das Cidades Patrimonio da Humanidade.
O conflito aparece a partir da apertura dun expediente sancionador a un de eses vehículos alugados. A pregunta é obvia, si existiron 29 traxectos por que só se abriu un expediente?. A pregunta leva tamén unha aclaración, que se abrira un expediente por unha denuncia non quere dicir que exista unha sanción.
Que di o goberno municipal?
O primeiro que di o goberno municipal é que non se contratou ningún servizo, colaborouse coa organización das Cidades Patrimonio da Humanidade e foi esta a que realizou o contrato. A alcaldes, Goretti Sanmartín, convidou ao voceiro do Partido Popular, Borja Verea, a que mostrara o contrato asinado polo concello.
A seguinte explicación do goberno municipal é sobre a situación de este tipo de servizos. No 2024 a Lei de acompañamento dos orzamentos da Xunta de Galicia deixa en mans dos concellos a regulación do aluguer de vehículos con condutor. Esta regulación non existe aínda en ningún concello o que provoca un baleiro legal. Non están prohibidos pero non están regulados.
Hai que dicir que esa regulación terá que marcar unha diferencia entre plataformas como Uber ou Cabify e o servizo usado en esta ocasión. Desde hai décadas é habitual alugar un vehículo con condutor en distintas situacións; unha voda, un artista que chega á cidade, un empresario que ven a traballar e non quere depender de taxis… situacións que se veñen dando, como dicimos, desde hai décadas.
No 1993 celebrouse o concerto dos mil anos na Coruña. Un dos artistas foi o único e inimitable Chuck Berry. Sempre esixía limusinas e en este caso non foi unha excepción pero non contento con iso decidiu conducila ata o hotel sen pensar que Coruña non ten as rúas do tamaño das de calquera gran cidade estadounidense; acabou por rascala. Volven ao que nos ocupa ese servizo hoxe en día sería “alegal”.
Escoitamos as declaracións da alcaldesa, Goretti Sanmartín, sobre todo isto
Que facemos?
É un feito que Compostela en certos momentos ten problemas co servizo de taxis. Non da a sensación que máis licencias o solucionen. Servizos como o que está en cuestión non están pensados para o usuario habitual xa que son vehículos de alta gama con condutores profesionais e contratados por unha empresa, non autónomos. Plataformas como Uber o Cabify abren unha porta ao autoemprego e poden complementar o baleiro entre a falta de taxis e o aluguer con condutor como xa sucede en moitas cidades.
O debate é como se pode regular, como esa regulación dividirá eses tres supostos para que cada un teña o seu oco sen pisar o dos outros. Tócalle aos políticos exercer e canto antes porque resulta evidente que esa regulación chega tarde. Cando falamos de políticos falamos de todos; os que teñen que levar a regulación ás comisións e ao pleno pero tamén os que denuncian o sucedido, suponse que o denunciante ten unha idea de como o resolvería e estaría ben que tamén a contara.
