Pese ao tempo que se leva falando da taxa turística, dos estudos realizados ou dos exemplos de outras cidades as asociacións de hostalería e de hotelería de Compostela seguen opoñéndose.
Algo non funciona nunha cidade cando cada tema de importancia que se toca acaba sendo unha constante discusión durante anos, a taxa turística non é unha excepción como imos ver. Xa no ano 2017, no mes de outubro presentábase a nova directiva da asociación de hostalería que se mostrábase disposta a falar da taxa.
No ano 2019 Compostela Aberta levaba ao pleno de setembro unha proposta sobre a xa famosa taxa. Tras a pandemia retomouse o tema e comezouse a falar sobre a que dedicar o diñeiro que se recadaría, era o 2022. Uns meses despois, en abril do 2023, o modelo de taxa turística presentábase ao sector. En marzo do ano pasado impulsábase unha mesa de diálogo co sector e un ano despois, en marzo pasado, falábase xa da implantación da taxa no verán e facíase no transcurso dunha nova reunión co sector.
En medio de todas esas reunións, plenos e propostas tiveron a bo seguro moitas máis conversas fora de foco. O concello ten que coñecer de sobras todas as posturas e o sector por onde camiña a taxa e como se implantará. Se algo disto non é así e que algo falla en algunha das dúas partes.
A protesta
Despois de todo este periplo onte o sector da hostalería facíase unha foto no Obradoiro para “mostrar publicamente unha vez máis o seu rexeitamento unánime á implantación desta taxa”. O sector, representado pola Asociación Hostalería Compostela e a Unión Hotelera, considera que a taxa é “inxusta, está mal deseñada e é precipitada”.
Fontes da Unión Hotelera lembran que os hoteis asociados “xeran máis de 1.000 empregos directos e contribúen de forma moi significativa ás arcas municipais a través do IBI, o IAE e o imposto especial de recollida de lixos”, e insisten en que “a hotelería legal é hoxe un dos grandes contribuíntes económicos do Concello de Santiago”.
Na súa opinión, “esta medida, lonxe de ordenar o turismo, penaliza inxustamente ao visitante que pasa a noite na cidade, que é precisamente o máis controlado, o máis responsable e o que máis contribúe á economía local”, e pola contra “ignora a quen realmente xeran a saturación urbana que se está dando desde hai anos por parte de excursionistas, cruceristas e grupos organizados que permanecen só unhas horas na cidade”.
Outra das razóns do rexeitamento é a intención de implantar a taxa este mesmo ano, en tempada alta, e con miles de reservas xa realizadas, explicando que “de aquí a final de ano espéranse decenas de miles de pernoctaciones en Santiago, realizadas por hóspedes que xa pagaron ou reservaron a súa estancia sen ningunha información sobre un sobrecusto que agora se lles quere impor”.
“Que ocorre se un cliente négase a pagalo? Quen asume a reclamación? E o prexuízo para o establecemento?”, pregúntanse desde a asociación, que incide en que “esta situación xera inseguridade xurídica, deteriora a confianza do visitante e traslada ao sector alojativo unha carga administrativa e legal que non lle corresponde”.
A taxa será levada a pleno este xoves para unha aprobación definitiva. Cada grupo terá que posicionarse e defender o seu voto pero o que resulta evidente é que se non hai un entendemento non pode ser porque se falara ou non se deran momentos e lugares para falar.
