Compostela, 9 de setembro do 2020 – O Tribunal de Contratación acepta as medidas cautelares propostas polo sindicato Comisións Obreiras e suspende a licitación do servizo de axuda ao fogar, SAD, de Santiago.
CCOO solicitou ao tribunal que suspendera de forma cautelar a licitación da axuda no fogar xa que consideraba que non estaba adaptado ao contexto derivado da crise sanitaria. Esta falta de adaptación ao Covid 19, podería, según o sindicato, supor un risco para traballadores e usuarios.
O sindicato explica que o orzamento ten un desfase, debido a varios erros de cómputo no capítulo de persoal e salarios, de case 200 000 euros anuais, contía que representa o 7 % do total. CCOO considera “ridícula” a partida e engade que o peor é que só o 0,1 por cento do total, 5482 euros por ano, é a cantidade destinada a dotación de luvas, material hixiénico, máscaras e outros.
Segundo os cálculos do sindicato, baseados na última normativa publicada sobre o uso das máscara, e partindo de que cómpre manter un stock para o caso de posibles rebrotes, a partida económica non debería ser inferior ao 5 % do orzamento anual.
Contra a decisión do Tribunal de Contratación non cabe recurso ningún, xa que é firme.
