Compostela, 3 de outubro do 2024 – A Federación Galega de Dano Cerebral (Dano Cerebral Galicia) celebra en Santiago unha sesión informativa sobre ocio inclusivo e accesible.
Estás sesións están destinadas a persoas con dano cerebral adquirido, unha discapacidade causada fundamentalmente por ictus e traumatismos cranioencefálicos coa que conviven máis de 35.000 persoas no noso país.
A iniciativa procura concienciar a persoal das administracións públicas, empresas e profesionais da xestión cultural sobre as barreiras físicas, comunicativas, cognitivas, sensoriais e socioeconómicas que enfrontan as persoas con dano cerebral adquirido cando queren acceder ou participar nunha actividade lúdica ou cultural.
En estas sesións, persoal técnico e usuarias das asociacións da Federación achegarán a realidade do colectivo. O obxectivo é compartir recomendacións e exemplos de boas prácticas para eliminar os principais obstáculos que impiden ou condicionan a participación igualitaria no acceso e goce das programacións culturais, os produtos de entretemento e/ou as actividades de ocio.
Trátase de promover o deseño de actividades de ocio e programación cultural dirixidas a todas as persoas con medidas favorecedoras da inclusión de quen ten discapacidade e superar así o modelo predominante, tendente a organizar actividades específicas, dirixidas unicamente a persoas con discapacidade e, por tanto, segregadoras.
Ciclo de sesións
A sesión de Santiago terá lugar o luns 7 de outubro, ás 10.30 h, na sede da asociación Sarela (Rúa de Pedro Cabezas González, 3). A asistencia é gratuíta pero, por cuestións de aforo, é necesario inscribirse previamente no seguinte formulario online: https://forms.office.com/e/XRP13JynA2
A actividade, que xa se celebrou en Lugo e tamén se realizará en Culleredo, Ourense e Vigo, forma parte dunha campaña de sensibilización xurdida no marco do “Proxecto Rumbo: cara a un modelo de autonomía persoal conectada e inclusiva” a partir da detección por parte do tecido asociativo de persoas e familias con dano cerebral adquirido da falta de coñecemento sobre a realidade do colectivo entre profesionais do sector cultural e operadores de ocio.
A intención última é superar o predominio dun concepto reducionista da accesibilidade, centrada no aspecto físico e no que as necesidades cognitivas non se atenden; e da perspectiva paternalista sobre a capacidade de decisión e escolla das persoas con discapacidade, aínda moi normalizada socialmente.
Proxecto Rumbo
O “Proxecto Rumbo: cara a un modelo de autonomía persoal conectada e inclusiva” é unha iniciativa colaborativa desenvolta entre distintas confederacións do terceiro sector da discapacidade (COCEMFE, ASPACE, Impulsa Igualdad, Daño Cerebral Estatal e AUTISMO ESPAÑA).
O obxectivo é impulsar o deseño de modelos innovadores de apoio á autonomía persoal e a vida independente de persoas con discapacidade, especialmente aquelas con maiores necesidades de apoios, mediante a combinación de servizos e recursos que poidan facilitar unha forma de vida inclusiva na sociedade en condicións de seguridade, accesibilidade e benestar.
Este proxecto, que conta coa participación de 22 entidades destas confederacións repartidas en cinco comunidades autónomas, está financiado polo Ministerio de Dereitos Sociais e Axenda 2030, con cargo ao Plan de Recuperación, Transformación e Resiliencia do Goberno de España, ligado súa vez aos fondos Next Generation da Unión Europea.
