Compostela, 2 de xuño do 2023 – Do 10 de xuño ata o 24 de setembro celebrase de novo o festival Go!Go!Zo! con distintas actividades entre as que destaca a segunda edición do XeneraSon Rock.
A organización XeneraSon explica que “A diferencia da anterior, este ano abrimos o abano de posibilidades e pode participar calquera banda novel, coa única condición de que non teña contrato cun selo discográfico”.
As reservas, cun custo de 25 € por integrante da banda, deberanse formalizar a través de www.gogozo.gal antes do 15 de xuño. O repertorio deberá incluír cancións en galego, versións de grandes éxitos e composicións propias, que se interpretarán nunha actuación de 20 minutos e un máximo de 4 temas.
O II XeneraSon Rock desenvolverase en dúas fases: as semifinais (os días 23, 24 e 25 de xuño) e a final (o 15 de xullo). Un xurado profesional será o encargado de valorar as actuacións pasando á última fase 6 bandas. Desas 6, dúas serán as gañadoras e, como premio, poderán gravar un EP nun estudo profesional e actuar en dous dos festivais estivais de referencia en Galicia.
XeneraSon Camp
Outra das grandes novidades será o desenvolvemento do XeneraSon Camp. Trátase dunha iniciativa transfronteiriza inédita que permitirá a mozos e mozas de Galicia participar nunha formación inmersiva dunha semana de duración na Escola do Rock Paredes de Coura.
Esta colaboración entre o festival e o centro formativo luso, supón unha rebaixa no prezo desta proposta, que é de 165 € e inclúe todo (desprazamentos, manutención, formación e actividades complementarias). “Agardamos que este novidoso proxecto sirva para que a nosa mocidade se anime a aprender máis sobre o eido musical da man de grandes profesionais, como os da Escola do Rock Paredes de Coura”, afirman desde a organización.
O campamento formativo desenvolverase entre os días 16 e 22 de xullo, incluíndo diversos concertos nos que os mozos e as mozas participantes poderán aplicar todo o aprendido en rigoroso directo.