Compostela, 21 de agosto do 2024 – O concello de Santiago cre que os problemas de transporte dos concellos limítrofes teñen que abordarse nun plan supramunicipal que recolla todas as demandas.
Nunha reunión co colectivo de taxista do Pino, que reclaman poder traballar no aeroporto Rosalía de Castro, a alcaldesa de Santiago de Compostela, Goretti Sanmartín, explicou que estas peticións deben ser estudadas no marco dun plan supramunicipal que inclúa todas as necesidades de transporte e mobilidade dos concellos limítrofes con Santiago, como por exemplo as de Teo e de Ames.
A alcaldesa, que estivo acompañada polo concelleiro Xan Duro, explicou que estas peticións deberían tratarse nunha reflexión máis ampla xeograficamente, dando cabida a outras demandas de mobilidade procedentes de toda a área metropolitana e que, ademais, deben contar co impulso da Administración autonómica.
Goretti Sanmartín e Xan Duro lembráronlle aos taxistas do Pino que neste momento o Concello de Santiago de Compostela está pendente de que a Xunta de Galicia emita o informe relativo á solicitude da ampliación dun 20% máis de licenzas de taxi para atender as necesidades da cidade e do termo municipal.
Cabe lembrar que nesta solicitude tamén se incluía a petición de que a Xunta promova a modificación lexislativa que permita as licenzas temporais, para atender as necesidades puntuais en tempadas de grande afluencia de visitantes.
