Compostela, 27 de abril do 2023 – O concello de Santiago reuniu ao sector da hostalería da cidade para presentar o modelo de taxa turística que se quere implementar en Compostela.
O catedrático de Dereito Financeiro e Tributario da USC César García Novoa foi o encargado de presentar o “Informe sobre a creación dunha taxa turística para un turismo máis sostible en Santiago de Compostela”. No encontro participaron representantes da Unión Hotelera Compostela, Hostalaria.gal e a Asociación de Hostelaría Compostela.
O alcalde, Xosé Sánchez Bugallo, valorou positivamente esta “primeira reunión de traballo” xa que “en xeral, maioritariamente se entende que é necesario e positivo que o turismo contribúa vía impositiva ao mantemento da cidade” e hai consenso en contar “cun procedemento o máis seguro e simplificado posible desde o punto de vista da súa tramitación e o máis equilibrado posible en canto á distribución da contía entre os diferentes tipos de establecementos”.
A que se dedicará?
A cuestión que xera máis debate e a finalidade a que se dedicarán os fondos recadados. Bugallo falou de destinalos á “rehabilitación e conservación da cidade histórica, no sentido máis amplo posible, que incluiría o mantemento da poboación que vive nela e o pequeno comercio tradicional”. Tamén apuntou outro uso ” cubrir o sobrecuste que o impacto turístico pode ocasionar en determinados servizos, unha vez sexa medido e cuantificado”. Finalmente dou unha terceira opción a “organización de actividades e eventos lúdicos e culturais que contribúan á desestacionalización do turismo e ao incremento da estadía media por turista e para o desfrute dos composteláns”.
A asociación Hostalería.gal emitiu xa un comunicado no que, como as outras asociacións, apoia a implantación da taxa pero engade ademais algunhas ideas. O colectivo aposta pola creación dun ente cunha “composición plural da sociedade” que sexa o que decida o destino dos fondos recadados.
Hostalería.gal propón usos como os apuntados polo alcalde pero tamén outros como o Impulso de proxectos de investigación científica, xunto coa USC, que contribúan á diversificación económica; mellora de formación e calidade do emprego e fomento da ocupación en tempada baixa que promova o mantemento de equipos de traballo con carácter estable ou actuacións en política de vivenda destinadas a fomentar o acceso á mesma na cidade, con especial atención ás persoas traballadoras do sector.
A taxa
César García Novoa, Catedrático autor do informe, partiu da idea de crear “un modelo de imposto aliñado coas tendencias que esixen noutras Comunidades Autónomas do Estado e noutras cidades de Europa”. Segundo explicou, trátase dun imposto autonómico de esixencia voluntaria para os concellos, de cuxa recadación poderán dispor para “sufragar os sobrecustos dos servizos turísticos que estimen oportunos”. O informe establece un modelo “sinxelo de aplicar” en colaboración cos establecementos de aloxamento hostaleiro e turístico, que “o turista liquidaría no momento de facer o check-out”.
A contía da taxa que se propón no estudo oscila “entre os 0,50 e os 2,50 euros en función da categoría do establecemento, incluíndo os pisos turísticos”, o que supón un prezo “moderado para evitar o impacto na demanda como xa corroboran os datos que existen”. A estimación de recadación anual na cidade sería entre 2,5 e 3 millóns de euros, “na media doutras comunidades autónomas”.
