Compostela, 3 de novembro do 2023 – O incendio da discoteca de Murcia e a proximidade no tempo dun pequeno incidente na sala Malatesta de Compostela puxeron sobre a mesa os desencontros da hostalería santiaguesa co concello.
Aínda que os procesos non cambiaron nos últimos tempos foi esta coincidencia a que motivou un comunicado das asociacións o pasado 26 de outubro. No documento recoñecían que era unha situación que viña de lonxe e solicitaban unha reunión co concello e o acusaba de “manter uns criterios interpretativos das normas absolutamente restritivos e con demoras inxustificadas”.
A reunión solicitada tivo lugar onte coa participación da alcaldesa, Goretti Sanmartín, e o concelleiro de Urbanismo, Iago Lestegás, xunto con persoal técnico. Pola outra banda participaron representantes de Hostelería Compostela, Hostalaría.gal e a Asociación de Bares, Pubs e Discotecas.
O obxectivo do encontro era explicar o contido do plan destinado a verificar as medidas de seguranza nos locais. A hostalería levaba a proposta de pór en marcha unha Mesa Sectorial, iniciativa que agora será estudada polo goberno municipal.
O plan que vai poñer en marcha o Concello, para o que di querer contar coa colaboración das asociacións que agrupan os establecementos de hostalaría, pretende garantir a seguridade das persoas usuarias dos locais. Engádese que “o sector da hostalaría é unha peza destacada no aspecto socioeconómico de Santiago de Compostela, con recoñecemento pola súa calidade e a cantidade de locais existentes”.
Como primeira medida o Concello elaborou unha instrución que guiará as inspeccións para que todas as partes teñan claros os obxectivos, que se dará a coñecer ás entidades asociativas do sector. Vaise comprobar o funcionamento dos percorridos de evacuación, a sinalización e iluminación de emerxencia e a seguridade contra incendios, fundamentalmente, sempre tendo en conta as condicións que se autorizaron para cada establecemento.
O fin último é garantir a seguridade dos locais e minguar a alarma social, ademais de ofrecerlles as mellores condicións ás persoas usuarias dos locais e favorecer a actividade do sector hostaleiro.
