Compostela, 7 de marzo do 2024 – O concello de Santiago de Compostela rematou cun acto oficial o despregue de fibra óptica no casco vello da cidade.
O investimento realizado en Compostela chegou aos 2,6 millóns de euros, asumidos nun noventa por cento pola operadora Orange e o resto por parte do Consorcio de Santiago. A despregadura permitiu o acceso á alta velocidade de máis de 6.000 vivendas, grazas aos máis de 21 km de fibra óptica instalados.
Os traballos de instalación de fibra óptica no casco histórico de Compostela desenvolvéronse en 13 fases. A primeira das etapas comezou en xuño do 2020 por aquelas zonas nas que non existía ningún tipo de conectividade e atendendo sempre á protección patrimonial e a lexislación vixente.
No acto, realizado nos salóns do concello, participaron a alcaldesa de Santiago de Compostela e presidenta do Consorcio, Goretti Sanmartín, acompañada de Miguel Rodríguez Quelle subdirector da área de Sociedade Dixital da Axencia para a Modernización Tecnolóxica de Galicia (Amtega), de Manuel Chaín, Subdirector Xeral de Conservación e Restauración de Bens Culturais da Dirección Xeral de Patrimonio Cultural da Xunta de Galicia xunto con Nani Fernández, directora de Relacións Institucionais de Orange e de Belén Hernández, xerente do Consorcio.
Todos destacaron a boa colaboración público-privada conseguida entre as partes implicadas. Unha relación que comezou en novembro do 2019 tras unha consulta pública e aberta na que participaron a Consellería de Cultura e Turismo, Amtega e o Concello de Santiago de Compostela.
Miguel Rodríguez Quelle dixo que esta colaboración foi o resultado dun equipo de expertos que traballaron arreo pola chegada da fibra óptica á Cidade Histórica compostelá, respectando o seu marcado carácter patrimonial sen perder nunca de vista o obxectivo final de poñer este esencial servicio á disposición da veciñanza.
Como resultado da convocatoria publicada, tres foron as empresas operadoras que presentaron unha proposta técnica de proxecto piloto para a instalación. Iniciábase así un longo proceso entre diferentes axentes públicos e privados, empresas contratadas e equipo técnico humano para os que a alcaldesa agradeceu, unha vez máis, o seu traballo.
A presidenta do Consorcio, Goretti Sanmartín, congratulouse do éxito deste proxecto “de vital importancia para o asentamento de poboación e negocios na Cidade Histórica” e recordou que “non foi un proceso fácil” xa que foi necesario “atopar os equilibrios para dotar de servizos unha zona da cidade que debe estar viva e habitada”
En palabras da xerente do Consorcio, desde a posta en marcha da convocatoria pública e ata a despregadura final da 13ª fase, todo o proceso e obstáculos que houbo que superar semellaba parecerse máis a unha serie de ficción, “como ben podería ser Las chicas del Cable”, engadiu. A xerente tamén fixo fincapé en que “a colaboración de todos os axentes implicados, que eran moitos, foi a clave do éxito”, e agradeceu tamén a extraordinaria colaboración veciñal coa que se contou en todo momento.
Unha vez fixadas e evaluadas as condicións que debería seguir a instalación da fibra por parte da Comisión Asesora do Plan Especial de Protección e Rehabilitación da Cidade Histórica de Santiago de Compostela, a operadora Orange ofreceuse a realizar a despregadura. Instalación da que Nani Fernández remarcou o fito de ser unha despregadura pioneira que tivo Compostela como proxecto piloto e exitoso que foi trasladado a diferentes cidades patrimoniais en toda España.
Levar a cabo a despregadura e conservar a estrutura patrimonial de Compostela foi todo un reto para organismos públicos e empresa operadora que tiveron que axustarse ás esixentes regulacións patrimoniais. Manuel Chaín, que tamén lembrou o nomeamento da cidade como ben declarado patrimonio da humanidade pola UNESCO fai 39 anos, definiu moi ben a despregadura ao enmarcala como un fito necesario para “preservar o pasado e garantir o futuro”.
