Pese ás alegacións en varios dos casos o inmoble situado na rúa Espírito Santo de Compostela recibiu seis ofertas e a máis alta supera en 60.000 euros o prezo de saída.
Este xoves celebrouse en Compostela a Mesa de Contratación para a apertura das ofertas recibidas no proceso de venda forzosa mediante poxa pública do lote 4, correspondente co inmoble en ruínas da rúa Espírito Santo 33 incluído no Rexistro de Soares. As seis ofertas presentadas foron admitidas e a máis alta superou en 60.000 euros o prezo de saída.
O prezo de saída deste inmoble era de 69.639,18 euros e a oferta máis alta recibida ascendeu a 130.639,18 euros. Esta oferta procede dunha persoa física. O montante polo que se valorou o inmoble para a súa venda forzosa ingresarase á propiedade do inmoble e a parte restante dedicarase a políticas de vivenda desenvolvidas polo Concello.
Tras este paso, a persoa que presentou a oferta máis alta deberá cumprimentar a documentación requirida para a súa comprobación, paso previo á adxudicación do inmoble, competencia da Xunta de Goberno Local de Compostela.
Tal e como explicou o concelleiro de Urbanismo, Vivenda e Cidade Histórica de Compostela, Iago Lestegás, é a primeira vez que se levou a cabo este proceso no Concello de Santiago. “Aínda que o procedemento sexa longo e difícil, o Rexistro de Soares é unha ferramenta útil para mobilizar o patrimonio inmobiliario desaproveitado e para ampliar a oferta de vivenda no centro da cidade aproveitando mellor o que xa temos”, destacou Iago Lestegás.
O proceso é a primeira vez que se realiza en Galicia pese a estar contemplado na lei desde hai anos. Unha ferramenta que veremos como avanza nos outros soares aos que se presentaron alegacións pero que poden aínda ter a súa propia puxa. As condicións son moi ríxidas pero poden impulsar rehabilitacións de outros espazos aínda no incluídos no rexistro de soares e dotar de máis vivenda ao casco vello.
