Compostela, 21 de xuño do 2023 – O goberno de BNG e Compostela Aberta xa traballa arreo para facerse co control efectivo da xestión municipal mentres na oposición todo son urxencias.
Psoe e Partido Popular percorren na oposición camiños distintos pero paralelos, polo que non deixan de mirarse. O PP en especial parece agardar a que os socialistas resolvan os seus problemas para que contesten aos seus constantes convites para desaloxar a BNG e CA. A cortesía dos cen días parece cousa do pasado.
Gonzalo Muíños voceiro socialista
A xestora que pilota o destino do Psoe, nomeou onte a Gonzalo Muíños como voceiro municipal. Segundo explicou o presidente da xestora, Diego Fernández, a de Muíños foi a única proposta trasladada polo Grupo Socialista, polo que é “froito do consenso e foi ratificada por unanimidade”.
Muíños é membro da executiva provincial do PSdeG-PSOE e conta cunha dilatada experiencia no Concello de Santiago, onde é concelleiro do Grupo Socialista desde 2011. Foi concelleiro responsable de Mobilidade, Seguridade Cidadá, Barrios, Obras e Relacións Veciñais no último goberno municipal de Xosé Sánchez Bugallo.
Agora Muíños e o presidente da xestora, Diego fernández, encargaranse das negociacións co BNG no que respecta ao pleno de organización. Ao mesmo tempo o novo voceiro terá que responder ás preguntas dos xornalistas e aos cantos de serea que chegan desde o PP.
Un Partido Popular na oposición
O PP decidiu non agardar nin cen días e xa na toma de posesión convocou aos medios para insistir nas críticas ao goberno municipal aínda non formalizado. Onte Borja Verea daba unha rolda de prensa na que seguía a convidar ao Psoe a que apoiara un cambio de goberno co PP, obviamente, na alcaldía.
Verea non descartou nada. Nin unha moción de censura nin unha coalición de goberno. O único que rexeitou foi acordos con concelleiros que hipoteticamente deixaran o grupo socialista “non é o noso xeito de facer política, o convite e ao grupo socialista” dixo. Hai que dicir que de suceder iso podería infrinxirse a lei antitransfuguismo.
Pero o Partido Popular tamén denunciou que nas negociacións, de cara ao pleno de organización, a proposta presentada polo BNG non era proporcional á representatividade dos grupos.
Verea non quixo dar datos pero si explicou que o goberno tería que ter 8 dedicacións exclusivas e que no goberno anterior había 14 polo que só quedan seis a repartir. Unha conta simple da a entender que presuntamente a proposta podería ser tres dedicacións para o Psoe e tres para o PP e que os populares agardan un reparto de catro e dúas pola diferenza de concelleiros.
A situación resolverase máis antes que tarde pero o que parece claro é que os primeiros meses de mandato van a ser unha constante fonte de novas. O seguinte capitulo será saber como o Psoe local resolve a súa crise de liderado da que pode depender a integración, ou non, no goberno municipal.
