Nun comunicado os catro ex concelleiros do PSOE, agora non adscritos, piden a revisión do expediente de expulsión asinado por Cerdán e acusan a Aitor Bouza de irregularidades nas primarias locais
A situación do PSOE a nivel nacional, a causa dos audios do dimitido secretario de organización Santos Cerdán, comeza a estenderse por distintos sitios de España e Compostela é un deles.
Os catro concelleiros non adscritos de Santiago (Gonzalo Muíños, Mercedes Rosón, Mila Castro e Marta Álvarez) emitiron un comunicado no que indican que pedirán ao partido a revisión do expediente de expulsión que foi asinado por Santos Cerdán.
O que podería parecer un argumento feble vai acompañado dunha acusación de presuntas irregularidades na elección da nova comisión executiva do PSOE en Santiago, e de Aitor Bouza como secretario xeral da agrupación.
O proceso de expulsión.
Os ex militantes do Psoe destacan da súa expulsión que “foi o secretario de Organización dimitido, Santos Cerdán, quen asinou finalmente a nosa expulsión do partido; tras ser ratificada a súa decisión por unha delegación do Comité de Ética e Garantías do PSOE. É oportuno sinalar que non foi convocado todo o Comité, senón só dúas persoas do mesmo, para acelerar a decisión de expulsión do partido, unha celeridade que non vemos na expulsión, por exemplo, do aínda militante socialista, José Luís Ábalos”.
Os non adscritos queren que, xa que se fará unha auditoría das contas do partido tamén se deben revisar as actuacións do ex secretario de organización Santos Cerdán e por iso “remitiremos novamente unha carta ao Secretario Xeral do PSOE e Presidente do Goberno, Pedro Sánchez, para que revise o noso expediente de expulsión e, sobre todo, analice as irregularidades que se produciron, tanto na tramitación dos expedientes como, nos intentos previos de deslexitimación do Grupo Municipal Socialista e, mesmo, na elección do secretario xeral local, Aitor Bouza Manso, así como a súa Comisión Executiva Municipal”.
A elección de Aitor Bouza
A segunda parte do comunicado dos concelleiros expón unha grave acusación sobre a elección da executiva local que, explican, foi denunciada ante a comisión de garantías do PSOE sen que se tomara en consideración.
Os ex militantes din que “Cremos que a opinión pública debe saber que, con carácter previo á elección da Comisión Executiva Municipal, integrada por Aitor Bouza Manso, Marta Álvarez-Santullano ou Pedro Blanco, entroutros, produciuse unha afiliación masiva de dubidosa legalidade”.
Dan detalles do sucedido que din foi posta en coñecemento do partido “Uns días antes de que se pechara o censo electoral que debía elixir a nova CEM, logo da dimisión de Sánchez Bugallo, o departamento de altas e censo federal comunicou 35 novas altas e traslados simultáneos de novos militantes á agrupación de Santiago, o que representa máis dun 10% do censo total”.
Engaden que se trata dunha situación anómala antes dun proceso como a elección da executiva local pero que o correo onde se comunicaba este feito nunca recibiu resposta. Lembran ademais que esta “afiliación masiva de dubidosa legalidade” comunicouse ao instrutor do primeiro expediente, Moisés Rey “que era plenamente coñecedor desta situación ao igual que o secretario provincial, Bernardo Fernández, quen chegou a dicir me importa un huevo quedarme sin Grupo Municipal Socialista en Santiago”.
Os catro concelleiros rematan o comunicado destacando que “o secretario de Organización federal, Santos Cerdán coñecía tamén o sucedido coas afiliacións masivas xa que, nas alegacións presentadas ante Ferraz, recibiu as probas documentais que así o demostraban. En ningún caso, ningún destes cargos do partido, considerou relevante investigar este suceso que pon en tela de xuízo a lexitimidade do proceso de elección da actual Comisión Executiva Municipal, tamén a expulsión arbitraria que esta promoveu contra nolas catro”.
Consideran que estes feitos demostran que o obxectivo, desde a mesma chegada do secretario xeral, Aitor Bouza, á agrupación de Santiago de Compostela, era relegarnos ao ostracismo político, limitar a nosa capacidade de influencia na agrupación e, en última instancia, expulsarnos do partido e forzar que entregásemos as actas de concelleiros para que el mesmo puidera entrar na Corporación Municipal”.
About the Author
