Compostela, 16 de febreiro do 2024 – O PSdeG no concello de Santiago preguntará ao goberno municipal polos pregos de licitación do servizo de xestión dos centros socioculturais.
Os edís socialistas mantiveron unha reunión con representantes sindicais dos traballadores. O encontro serviu para coñecer, ademais das demandas dos empregados, que o servizo nos centros socioculturais “segue a presentar importantes carencias”.
A socialista Mercedes Rosón destaca os problemas da empresa Serviplus que se encarga do contrato máis amplo dos 4 nos que se divide a concesión, o de animación sociocultural con actividades recreativas, de ocio e de tempo libre.
Rosón insiste en reclamar que se axilice a nova licitación, como xa fixo en decembro do pasado ano, cando comezaron a circular informacións “preocupantes” sobre a saúde económica da empresa responsable do servizo.
Agora, explica a edil socialista, persisten as dificultades dos traballadores para cobrar as nóminas (arredor de 70 dependen desta empresa) recibíndoas tarde “con varios días de retraso”.
Ademais, asegura que as representantes dos traballadores téñenlle trasladado ao Grupo Municipal Socialista importantes deficiencias na prestación do servizo, concretamente no relativo á falta de materiais e na coordinación do persoal dos centros socioculturais “Hai baixas que non se cobren e certo descontrol, que provoca un detrimento na calidade do servizo” explica Mercedes Rosón.
A concelleira engade que isto ten consecuencias para as facilidades de conciliación dasfamilias “pode ocorrer, e así nolo trasladan, que haxa persoas usuarias que chegan a un centro e que este estea pechado porque non se cubre a unha traballadora que ese día non pode ir a traballar con motivos xustificados”.
Ante esta situación Mercedes Rosón reclámalle ao goberno local un calendario con prazos concretos para a nova licitación do servizo, xa que o 30 de xuño deste 2025 remataría a prórroga que o executivo concedeulle ao actual contrato “queremos, e sobre todo as persoas que dependen laboralmente deste servizo, queren ter a certeza de que antes desa data, haberá un novo contrato adxudicado”.
