Bisbarra, 26 de xaneiro do 2023 – O sindicato CIG convoca unha protesta este sábado en Compostela para defender a atención primaria e reclamar melloras e inversións.
Os problemas na atención primaria afectan a todo o sistema. No 2017 xa falabamos dos colapsos das urxencias, no 2019 a medicina de familia poñíase en folga, no 2021 os centros de saúde seguían pedindo inversións e hai uns meses presentábase unha ILP pedindo cambios na lexislación. Os problemas actuais non poden ser unha sorpresa para ninguén.
Agora, unha vez máis, pediranse cambios na rúa. CIG-Saúde demandou en rolda de prensa, un modelo de atención primaria “que dea as e os profesionais os recursos necesarios para poder atender con dignidade as necesidades da cidadanía. Un modelo que precisa de persoal suficiente e dunha estrutura organizativa que planifique, xestione e a dote deses recursos”.
A concentración está convocada para o vindeiro sábado día 28 de xaneiro, ás 12:00h, na praza de Praterías, co lema “Máis Atención Primaria”.
O secretario nacional de CIG-Saúde, Manuel González Moreira, que compareceu acompañado dos membros da Executiva Nacional da federación, Xabier Alvedro e Lucía Peón, denunciou que o modelo de xestión integrada ou de áreas sanitarias que se desenvolveu nos últimos anos anulou “a capacidade de planificación e de xestión da Atención Primaria, mesmo desaparecendo a súa denominación das estruturas de xestión da Sanidade Pública”. Unha situación que considerou que foi “un grave erro que fixo perder recursos” e que denunciou que “formou parte dunha estratexia para debilitar a atención primaria da que agora estamos pagando as consecuencias”.
Defendeu a recuperación das Xerencias de Atención Primaria e a creación de equipos multidisciplinares para dar resposta ás necesidades das e dos doente e a incorporación de novas/os profesionais para atender ás novas necesidades. Nese sentido lembrou que, por exemplo, en 2008 incorporáronse fisioterapeutas, pero non se incrementou o cadro de persoal e “agora as agardas para conseguir citas son tan longas que son inoperativas, non resolven os problemas e moitas delas acaban na privada”.
Do mesmo xeito reclamou a incorporación de psicoloxía clínica para a atención aos problemas de saúde mental e de terapia ocupacional. Profesionais que, explicou, “poden axudar a resolver problemas sen sobrecargar as consultas de medicina de familia ou de enfermería e que permitirían acurtar as citas”.
