O novo cuartel xeral da super Computación en Galicia estará no polígono da Sionlla. O investimento no novo CESGA, entre infraestrutura e equipamentos, superará os 56 millóns de euros.
O Centro de Super Computación de Galicia, CESGA, aínda terá que esperar para trasladarse ás novas instalacións pero a colocación da primeira pedra marca o inicio dunha nova etapa. As actuais instalacións hai tempo que se sabían insuficientes pero o cambio precisaba dunha planificación e recursos complicados de conseguir.
No acto de colocación da primeira pedra participaron o presidente da Xunta, Alfonso Rueda, e o Delegado do Goberno, Pedro Blanco, entre outras autoridades e responsables do CESGA. Este é o primeiro proxecto que recibe a nova cualificación administrativa de proxecto estratéxico de investigación pública, unha nova figura administrativa que permite simplificar trámites e reducir tempos,
Pedro Blanco destacou que o investimento do Ministerio de Ciencia e Innovación a través do Plan de Recuperación, 47,4 millóns de euros, permitirán construír “o auténtico epicentro tecnolóxico do noso país e unha das grandes referencias da innovación en Europa”.
Para Blanco “a sede do CESGA marcará un antes e un despois para o desenvolvemento tecnolóxico do país, reforzando o papel de Galicia como un dos grandes nodos dixitais de Europa, capaz de atraer talento, xerar emprego e impulsar ciencia de excelencia”.
O Delegado tamén expresou a súa felicitación ao persoal do CSIC e á súa delegada en Galicia, Carmen González, resaltando “décadas de traballo rigoroso, apaixonado e esencial para o avance científico. Grazas ao voso esforzo, Galicia é hoxe unha referencia nacional e internacional en investigación e por iso o CESGA tamén é voso”, destacou.
Pola súa banda o Presidente da Xunta, Alfonso Rueda, destacou que “avances como o novo datacenter do CESGA ou a recente adxudicación da fábrica de IA. das que só haberá 19 en toda Europa, sitúan a Galicia na vangarda europea destes sectores”.
Rueda engadiu que “O que hai moito tempo parecía imposible, que este recuncho en España e Europa estivera liderando algo con tanto futuro e tan complexo como a tecnoloxía cuántica, hoxe é unha realidade”.
As instalacións albergarán, entre outro equipamento, o superordenador Finisterrae IV, que multiplica a capacidade do Finisterrae III, un novo sistema de almacenamento e un novo computador cuántico. En total, o investimento do centro ascenderá a 56 millóns de euros, entre construción e equipamento, cofinanciados con fondos europeos.
Durante o acto, Alfonso Rueda tamén aproveitou para deixar unha mensaxe en vídeo na cápsula do tempo virtual do CESGA, almacenada no tipo de dispositivos que o centro utiliza para datos importantes que necesitan ser conservados durante moito tempo.
