Compostela, 10 de xuño do 2024 – Santiago de Compostela acolle un ano máis a festa do comercio local, Prima 24, os vindeiros 14 e 15 de xuño.
Prima 24 ofrecerá música pasarrúas, animación infantil e moitos agasallos. A programación foi presentada pola concelleira de Dereitos e Servizos Sociais, Promoción Económica e Xuventude, María Rozas, que estivo acompañada pola técnica responsable da área de Comercio, Lucía Castro.
Rozas reiterou o compromiso do seu departamento co comercio local xa que “son os que fan cidade e os que mesmo contribúen a construír identidade”. Destacou ademais “a boa acollida, xa non só deste programa, senón de todas as actividades de dinamización que organizamos desde o departamento de Comercio ao longo do ano, como é o caso da época de Nadal”.
A programación de Prima 24 chegará a distintos recunchos da cidade comezando na tarde do día 14 con diferentes pasarrúas. Na zona vella correrá a cargo da banda Tanto nos ten; Pulpiño Viascón levará o seu show itinerante “A Trikidisco” por Conxo e Pontepedriña; e na zona de Concheiros e San Pedro estará a montaxe “O estrano caso do dentista da rúa Blasov”, de Troula Animación. Mentres, na Praza Roxa, desenvolverase a chamada “Prima pequena”, unha festa infantil con maxia e música, coas actuacións de Mamá Cabra, Joshua Kenneth e Pakolas.
Xa no sábado 15, a “Prima 24” chega cargada de propostas para todos os gustos. A praza de Cervantes acollerá unha exhibición dos mestres artesáns de Ourives de Compostela, que se vai desenvolver en horario de mañá e tarde, de 10.00 a 14.00 e de 16.00 a 20.00 horas.
Na Praza Roxa actuará o Trío Detrés co seu espectáculo “+Ritmo” a partir das 12.00 horas. Na axenda do sábado inclúense tamén cadanseu pasarrúas pola zona vella e polo Ensanche. O primeiro será pola mañá, coas acrobacias e malabares da compañía Tótem; e o segundo pola tarde, co repertorio de jazz dos Dixie Kings.
Por último, a praza de Feixóo será escenario de dous concertos: a partir das 13.00 horas a cargo da Ukestra do Medio, e ás 20.00 horas de Anxo Araújo. No caso de chuvia, estes concertos serán na praza de Mazarelos.
Ruleta de agasallos
Prima 24complétase coa xa tradicional ruleta de agasallos “Eu merco aquí”, que estará instalada o venres pola tarde na praza Roxa e o sábado pola mañá na praza do Toural. Nela poderán conseguir diferentes premios todas as persoas maiores de 16 anos que presenten un tícket por unha compra realizada no comercio de Santiago entre o 10 e o 15 de xuño, por un importe igual ou superior a 5 euros. Cada tícket dá dereito a unha tirada, e cada persoa non poderá recibir máis de tres premios, que serán agasallos mercados no comercio local.
Participación activa do comercio
María Rozas, convidou os e as comerciantes “a sumárense á festa, sacando os seus produtos ás beirarrúas, adornando as súas tendas para a ocasión, e difundindo a cartelería para informar á súa clientela da programación”. María Rozas lembrou tamén que o Concello, como en anos interiores, distribuirá bolsas coa imaxe da campaña #EuMercoAquí, que se entregarán de balde ao comercio local a través das asociacións de comerciantes da cidade.
Para contar con este agasallo, os e as comerciantes interesadas deben dirixirse ás entidades Comercio Punto Compostela, Santiago Centro, Compostela Monumental, Asociación En Rede, Ourives de Compostela, Asociación Somos Hórreo, Asociación de Comerciantes do Barrio de San Pedro e Asociación de Comerciantes de Área Central.
Ademais, de maneira presencial repartiranse carteis e folletos coas actividades do “Prima 24”, que tamén se pode consultar na web www.comerciolocalsantiago.gal.
