Compostela, 20 de maio do 2024 – Santiago de Compostela ven de asumir a presidencia de REDEL, a Rede de Entidades de Desenvolvemento Local que da servizo a cerca de 2.000 concellos.

Compostela participou o pasado sábado ,a Asemblea Xeral de REDEL celebrada en Xixón. Durante os próximos anos, Santiago asumirá a presidencia a través da técnica responsable da Oficina de Promoción Económica e Emprego, Carme Casado.

O Concello de Santiago é socio fundador de REDEL, que naceu en 2007 co obxectivo de impulsar a colaboración entre as axencias de desenvolvemento local para ampliar os seus coñecementos e desenvolver proxectos de maneira conxunta.

Na asemblea de Xixón incorporáronse a REDEL a Deputación de Xaén e o concello de L’Alfàs del Pi. Desta maneira, xa son 35 as entidades de desenvolvemento local asociadas a REDEL, que ofrecen os seus servizos a un total de 1.959 municipios cunha poboación que supera os 23 millóns de habitantes.

Na súa intervención diante da Asemblea Xeral, a nova presidenta de REDEL, Carme Casado, salientou o crecemento da entidade en número de socios nos últimos anos, e agradeceulle o seu traballo nese sentido ao seu antecesor no cargo, Fernando Nebreda, da Axencia de Desenvolvemento de Oarsoaldea.

A técnica responsable da Oficina de Promoción Económica e Emprego explicou que neste mandato, obxectivo é “traballar para compartir as ferramentas das que dispoñen as diferentes axencias, sobre todo coas entidades máis pequenas que dispoñen de menos recursos humanos e técnicos”.