Compostela, 10 de xaneiro do 2022 – O alcalde de Santiago, Xosé Sánchez Bugallo, e a concelleira de Economía, Facenda, Persoal, Contratación e Modernización da Administración Local, Marta Abal, presentaron o borrador de orzamentos para o 2022.
As contas da cidade para o presente ano ascende a 130.065.329, 19 euros, 5.045.251,42 euros máis que en 2021 (un 4,04%). O rexedor cualificou os orzamentos de “dignos”, adecuados “ás necesidades da capital de Galicia” e “absolutamente imprescindibles”.
As contas contan co apoio de Composatela Aberta polo que a súa aprobación está garantida. Bugallo destacou tamén o esforzo realizado en tres puntos: en primeiro lugar, no relativo ás partidas destinadas a “seguir apoiando aos sectores máis prexudicados pola covid: comercio, hostalería, turismo”; en segundo lugar, o incremento do gasto como consecuencia da posta en funcionamento dos novos servizos: “parques e xardíns, o Servizo de Axuda no Fogar, a limpeza e recollida de lixo ou a previsión en relación co transporte público”, enumerou; en terceiro lugar, Sánchez Bugallo fixo fincapé nos investimentos, que se concentran “nos barrios, nas parroquias e nos sectores sociais máis desfavorecidos”.
Dentro do capítulo de investimentos a concelleira de Facenda salientou “o importante incremento do gasto destinado ao ámbito rural”, dun 45,89%, pasando de 2.438.336,35 € no ano 2021 a 3.557.320,56 € no ano 2022, “dos cales 2.541.762,28 € se financian con recursos municipais e 1.015.558,28 € con fondos do plan provincial”. En este aspecto o alcalde destacou que se destinarán 841.000 euros para saneamento e 1 millón de euros específico ao mantemento dos viarios. No caso do ámbito urbano, o mantemento de firmes estará dotado con 1,1 millóns de euros. A ambas cantidades (1 millón no rural e 1,1 no urbano) súmanse os 750.000 euros previstos no contrato ordinario de mantemento, que tamén ve incrementada a súa contía con respecto ao ano pasado.
Sánchez Bugallo desgranou a partida de investimentos falando, entre outros puntos ddos seguintes:
– Dotación orzamentaria para respaldar os proxectos europeos aos que concurríu o Concello ou xa ten concedidos: algo máis de 700.000 euros.
– Actuación na zona de San Ignacio de Loyola: 911.740 euros.
– Diferentes actuacións en barrios: reurbanización da ruela das Salvadas (300.000 euros), da rúa Mallou (350.000 euros), da rúa Pombal (450.000 euros), da rúa Castrón Douro (420.000 euros), ou reparación e acondicionamento da avenida de Vilagarcía (125.291,75 euros).
– Actuación na rúa García Lorca (Vite): 750.000 euros.
– Intervención no parque de Bombeiros, que se concreta na achega de 520.000 para o acondicionamento do novo edificio (o 20% do orzamento global, parte que lle corresponde achegar ao Concello); e 544.809 euros para a adquisición de novo equipamento.
– Plan de Sostibilidade Turística: 700.000 euros.
– Renovación da cuberta do pavillón do CEIP Quiroga Palacios: 420.000 euros.
– Mellora e acondicionamento de diferentes instalacións deportivas: 1 millón de euros.