Compostela, 20 de decembro do 2021 – 33 espectáculos configuran a programación de Artes Escénicas de Compostela Cultura para o primeiro semestre de 2022.
A concelleira de Acción Cultural, Mercedes Rosón, e o director-xerente do Auditorio de Galicia, Xaquín López, presentaron a programación de artes escénicas acompañados polo director de AGADIC, Jacobo Sutil, pois algúns dos espectáculos prográmanse dentro da Rede Galega de Teatros e Auditorios.
O programa arrinca os días 14 e 15 de xaneiro con ‘Shock 1’ e ‘Shock 2’, as dúas propostas de Andrés Lima coproducidas polo Centro Dramático Nacional e baseadas en ‘A doutrina do shock’ de Naomi Klein. Un libro que narra os experimentos sobre control realizados nos Estados Unidos despois da segunda guerra mundial e que os relaciona coas teorías económicas de Milton Friedman.
Polo escenario pasarán Pinochet, Allende, Thatcher, Reagan, Mandela, a familia Bush, Aznar ou Saddam, entre outros moitos, representados por actores e actrices recoñecidos como Antonio Durán “Morris”, Alba Flores ou Willy Toledo.
O mes de xaneiro continúa coa estrea absoluta de ‘O deus do pop’ de Diego Anido os días 21 e 22 e péchase o 28 e 29 con ‘Cigarreiras’, obra baseada en ‘La tribuna’ de Emilia Pardo Bazán, dirixida e versionada por Cándido Pazó. Sobre o escenario, un elenco integramente feminino formado por algunhas das actrices máis recoñecidas do noso teatro: Tamara Canosa, Susana Dans, Merce Castro, Isabel Naveira, Berta Ojea, Ana Santos e Ledicia Sola.
A programación conta tamén co apoio do Consorcio de Santiago e a Deputación da Coruña, así como do programa Platea do Ministerio de Cultura. Serán un total de 33 espectáculos, 45 funcións, que se poderán ver no Auditorio de Galicia e no Teatro Principal de xaneiro a maio. As mellores propostas de teatro, danza e circo do momento… e unha programación destinada a público familiar que inclúe dous espectáculos especiais para bebés. Propostas variadas, dirixidas a todos os públicos e cuns prezos moi accesibles.
A programación completa e venda de entradas en CompostelaCultura
Entradas á venda
Todos os espectáculos serán ás 20.30 h agás os de En Familia que teñen uns horarios específicos e os dous ‘Shock’ que serán as 19.30 h pola súa duración. As entradas para todos eles poñeranse á venda este martes, 21 de decembro, ás 11.00 h, tanto na páxina web compostelacultura.gal como na Zona C. Punto de Información Cultural que abre de martes a sábado, de 11 a 14 e de 16 a 19 h. Ademais, poderán mercarse entradas nos espazos escénicos nos que se celebren os espectáculos o propio día da función desde unha hora antes do seu comezo.
As entradas teñen uns prezos de 10 a 14 euros, cos descontos do 50% para os colectivos habituais (persoas desempregadas, perceptoras de rendas sociais, xubiladas, maiores de 65 anos, estudantes, menores de 25 anos e membros de familias monoparentais ou numerosas). Os espectáculos de En Familia, incluídos os de bebés, terán un prezo único de 3 euros por persoa.
Club C! e #posfuncións
O Club C! É unha proposta de actividades que buscan coñecer mellor as propostas artísticas e desta forma afondar na experiencia como espectadores e espectadoras. Dentro das actividades do Club C! este semestre haberá as #posfuncións. Ata en nove dos espectáculos, cando baixe o pano, poderemos conversar cos membros do equipo sobre o seu traballo e haberá un debate aberto ao público.
Agasalla Compostela Cultura
Desde a concellaría de Acción Cultural convídase a todos e todas as compostelás a agasallar cultura neste Nadal. Para iso, póñense a disposición da cidadanía uns tarxetóns e sobres de agasallo que se poden recoller de balde na Zona C.
