Outono das Artes é unha programación impulsada pola Deputación e que organizará máis de 90 actividades por toda a provincia a partir do vindeiro 6 de setembro.
O ciclo Outono das Artes comezará en Compostela o 6 de setembro co concerto de ‘De Ninghures’. A cita será no Campo de Conxo ás 21.00 h. A alcaldesa de Santiago, Goretti Sanmartín, e a deputada de Cultura da Deputación, Natividade González, presentaron o programa completo acompañadas de varias persoas artistas que participan neste evento.
O Outono das Artes 2025 recolle unha ampla programación cultural que levará máis de noventa actividades de música, danza, teatro e audiovisual a concellos de toda a provincia entre setembro e decembro.
A rexedora compostelá agradeceu á Deputación a súa colaboración na realización desta actividade, “que lle pon o ramo ao centenario da anexión de Conxo a Santiago de Compostela”. Deste xeito complétase “unha ampla programación na que desde o Concello estivemos implicados de forma transversal entre todos os departamentos cos actos propios do Centenario e a Festa do Banquete, que foron un éxito como ben é sabido”.
Goretti Sanmartín volveu facer fincapé na importancia dos barrios e as parroquias na conformación da identidade compostelá e na descentralización da cultura, tanto nas vilas pequenas da nosa contorna como na propia capital galega, como é exemplo este concerto no barrio de Conxo. Ademais, destacou que este concerto “ponlle o ramo” ás celebracións do centenario da anexión do concello de Conxo a Santiago de Compostela.
Tanto a rexedora como a deputada provincial defenderon a cultura “como un dereito” e, en palabras de Goretti Sanmartín, “non pode restrinxirse” a unha época do ano ou ás festas. Neste sentido, reivindicou o outono en Compostela como un periodo de “esfervescencia” cultural, con citas como Cineuropa.
Programación de Outono das Artes
Despois do concerto inaugural, o programa viaxará por vilas e cidades como Ortigueira, Ferrol, Negreira, Sada, Ribeira, Oroso, Carral, Muros, Pontedeume, Betanzos, Carballo, Rianxo ou Vimianzo, entre moitas outras, ofrecendo propostas que abranguen desde concertos e recitais ata pezas de danza contemporánea, teatro familiar e proxeccións audiovisuais.
O calendario de setembro inclúe actividades todas as fins de semana e tamén en horarios de tarde e noite, co obxectivo de facilitar a participación de públicos diversos, tanto infantil como adulto, reforzando así o carácter plural e inclusivo do ciclo.
A deputada de Cultura, Natividade González, subliñou que “Outono das Artes é unha aposta decidida pola descentralización cultural e polo apoio ao talento galego, garantindo que a veciñanza de toda a provincia poida gozar dunha programación de primeiro nivel”.
O ciclo manterase activo ata mediados de decembro, pechando cunha programación especial de teatro, danza e concertos en diferentes puntos da provincia. A programación completa, con datas, horarios e localizacións, pode consultarse nas canles oficiais da Deputación da Coruña.
