Compostela, 28 de novembro do 2023 – O Nadal de Compostela estenderase por toda a cidade, desde o urbano ao rural, baixo o lema “Compostela, a estrela do Nadal”.
Unha idea xeral que foi presentada onte no concello pola alcaldesa, Goretti Sanmartín, e a primeira tenente de alcaldesa, María Rozas. O motivo central é unha estrela de oito puntas que se materialíza en oito xardíns de Nadal en San Roque, San Pedro, As Fontiñas, Sar, O Castiñeiriño, Conxo, Santa Marta, Vista Alegre, ademais do central na praza do Obradoiro.
Estes xardíns terán ademais unha parte moi especial que implica á veciñanza. En eles situarase un photocalls coa finalidade de que todo o que queira poida fotografarse no “Bico no Visgo”, bicarse baixo o visgo e despois subir a imaxe ás redes sociais.
O programa irase presentándose pouco a pouco e hoxe mesmo daranse a coñecer as actividades da carpa da praza Roxa. Pero o Nadal en Compostela terá moitos lugares de interese porque, ademais dos xardíns, haberá dous mercados, Carreira do Conde e da Estrela; 11 beléns visitables; iluminacións específicas como as das estatuas da Alameda e por suposto actividades en todos os Centros Socio Culturais.
A intención do concello é que as festas do Nadal sexan as terceiras máis importantes da cidade despois das da Ascensión e o Apóstolo.
Goretti Sanmartín salientou que se trata dunha “proposta ambiciosa” que pretende converter esta celebración nun “espazo e momento de referencia para a poboación de Compostela e da comarca e mesmo do conxunto do país” con “actividades para todos os públicos” que cheguen aos distintos barrios e parroquias “facendo que sexan o máis descentralizadas posible”. Para María Rozas trátase de ter unhas festas de Nadal “para vivir e non só para ver”.
Esta nova imaxe distribuirase por todo o concello a través de 25.000 programas de peto, carteis, voandeiras, bolsas, mupies e redes sociais. Toda a información complementaria poderase atopar a través dos códigos QR insertos en todos os programas e carteis.
Acendido do alumeado
Este venres día 1 terá lugar o acendido das luces co que comezará oficialmente o Nadal na cidade. Será as seis e media na praza do Obradoiro, pero despois a comitiva percorrerá distintos puntos e irá descubrindo algunha sorpresa.
As luces estarán acendidas ata o 7 de xaneiro en horario de 18.00 h a 2.00 h e de 7:00 a 9:00 h, agás dos días 24, 25 e 31 de decembro de 2023 e o 5 de xaneiro de 2024, nos que a iluminación permanecerá acendida desde as 18.00 h ata as 9:00h do día seguinte.
Haberá instalacións propias na Porta Faxeira, Mercado de Abastos, Bonaval, Obradoiro, na Alameda e na praza Roxa.
