Compostela, 21 de xuño do 2022 – Este mércores 22 preséntase en Compostela o libro “Cómplices. A violencia machista institucional” cunha charla na sede do Ceesg.
A coordinadora da publicación Iria Vázquez e unha das autoras incluídas, Sheila Fernández, conversarán sobre “Cómplices” coa presentación e moderación de Natalia Domínguez Galán (Grupo Fiandeiras). A cita de sete a nove na sede do Colexio de Educadoras e educadores sociais de Galicia.
O libro
“Cómplices. A violencia machista institucional” é un volume que trata e fai visible un tema tan preocupante como a violencia que exerce o Estado a través das súas institucións sobre as mulleres que están en situación de violencia machista.
En Cómplices, a autora explora varios eidos institucionais e convida a outras autoras. Sheila Fernández Míguez (desde o eido xurídico), Olalla Villaronga Seoane (desde o eido rural), Lola Ferreiro Díaz (desde o ámbito sanitario) e Ana Martínez González e Fedra Alcaraz Ladrero (desde o ámbito da diversidade funcional) a completar o panorama dunhas institucións que deberían acoller e defender as mulleres violentadas polo machismo.
A través deste libro o lector coñecerá o labirinto polo que pasan as mulleres en situación de violencia, analizando as forzas de seguridade, o eido xudicial, os servizos sociais ou o eido sanitario.
A coordinadora
A publicación foi coordinada por Iria Vazquez silva. Licenciada en Socioloxía pola Universidade da Coruña (2004), é doutora tamén en Socioloxía coa tese “La inmigración senegalesa en Galicia: remesas y cuidados en familias transnacionales” (2014). Foi profesora interina de socioloxía na Universidade de Vigo e integrante do Grupo de Estudos Territoriais da Universidade da Coruña.
Realizou o proxecto Mulleres inmigrantes, lingua e sociedade. Novas perspectivas para a integración (2015-2017), desenvolvido na Universidade de Vigo e financiado pola Xunta de Galicia. Especialista en xénero pola Universidade de Vigo e en igualdade pola Universidade Autónoma de Barcelona. As súas liñas de investigación abranguen a socioloxía das migracións, ademais da socioloxía do traballo e de xénero. Traballou no ámbito da intervención social con mulleres en situación de violencia e colaborou con diversos colectivos feministas de Galiza.
Publicou no Journal of Ethnic and Migration Studies “Transnational mothering strategies: Senegalese experiences” (2017), con Luna Vives. Publicou artigos na Soziologia eta zientzia politikoaren euskal aldizkaria (en galego, Revista vasca de socioloxía e ciencia política) e en diversos congresos.