Compostela, 29 de xullo do 2021 – A Asociación de Hostalería de Compostela móstrase preocupada polo futuro do sector e chama á responsabilidade de todos.
Os representantes da hostalería amosan a súa profunda preocupación polo estado económico e anímico do sector. Tras as novas restricións impostas ao sector a Asociación considera que “estamos nunha situación de pandemia e que a saúde debe ser o primeiro, pero a hostalaría leva moito tempo sufrindo e cada vez resulta máis difícil sacar os nosos negocios adiante”.
As novas limitacións que entrarán en vigos este sábado, e nas que estarán incluídos Santiago e Ames, supoñen o peche do interior do ocio nocturno e a necesidade de presentar un carné de vacinación, proba negativa de covid-19 ou un documento de pasar a enfermidade para acceder ao interior de bares e restaurantes.
O presidente, Thor Rodríguez, explica que “Esperamos que este sexa o último esforzo. Facemos un chamamento á responsabilidade individual e colectiva da sociedade para frear o incremento dos contaxios. Preocúpanos tamén que mentres os hostaleiros seguimos cumprindo coa normativa, se sigan producindo gromos en reunións de tipo de privado que non se están a controlar”.