Compostela, 10 de abril do 2023 – O problema da rúa de Vedra é un máis dos que ten a Pontepedriña en canto ao tráfico pero muro lindeiro coa estación ponos sobre a mesa.
O candidato popular á alcaldía, Borja Verea, reuníase cos veciños e apostaba polo retranqueo do muro da rúa de Vedra. Consideraba que a solución de “fixar unhas pedras con cemento” non é suficiente e hai que buscar un acordo definitivo.
Durante a reunión, o candidato á Alcaldía insistiu en levar a cabo un estudo serio do tráfico na zona xa que “hoxe en día existen rúas, como a Brión, nas que é imposible manobrar con coherencia”. O que propón é “evitar rodeos innecesarios que complican o tránsito diario dos vehículos dos alí residentes”.
A maiores dos problemas das rúas interiores da Pontepedriña, Verea cualificou de “imprescindible” unha humanización do Restollal pero sen esquecer que “estamos a falar dunhas das principais vías de entrada á cidade e non podemos de súpeto eliminar o tráfico desta zona”. Así, para o candidato popular é necesario soterrar a rotonda e mellorar o acceso peonil, co que se facilitaría a vida dos veciños de Pontepedriña.
A proposta é moi semellante a xa anunciada polo equipo de goberno de Sánchez Bugallo aínda que desde o Partido Popular son moi críticos. Explican que o candidato socialista
“continúa coa súa táctica de presentar os mesmos proxectos que hai 4 anos, como o que lles intentou vender aos veciños do Restollal e que non convenceu a ninguén, ou como a piscina de Santa Marta, da que durante esta lexislatura nada de soubo pero que agora en plena campaña volve sacar da chisteira”.
Desde o goberno municipal atópanse coa postura do ADIF que quere que o custo do retranqueo sexa asumido polo concello. Bugallo non está disposto a pagar a remodelación da zona se o muro non se retira cando menos tres metros pero desde o Administrador de Infraestruturas Ferroviarias só ofertan un e medio.
