Compostela, 31 de xaneiro do 2025 – Compostela segue dando pasos para fortalecer e preservar un patrimonio natural xa moito máis importante que o de outras vilas maiores, agora foi o momento de salvagardar a finca do Espiño.
O Pleno municipal acordou a aprobación definitiva da modificación puntual do PXOM e do PE-1 que suprime o aproveitamento lucrativo na parcela privada da Finca do Espiño.
O obxectivo de esta modificación é preservar a calidade ambiental e paisaxística deste espazo. A decisión tomouse cos votos favorables de BNG, CA e PSdG e a abstención do PP.
A aprobación no ámbito da Finca do Espiño permitirá eliminar a edificabilidade e os usos privados nesta parcela previstos no planeamento aprobado en 2004.
Agora distínguense dúas zonas no ámbito suxedo Espiño. Por unha banda unha zona cualificada como dotación pública, que inclúe os parques urbanos denominados PU-14.1.b e PU-FE e máis o equipamento SC-FE.
Por outro lado unha zona edificable de titularidade privada, a parcela EM-FE, de 8.012 m2, disposta no perímetro do ámbito, con aproveitamento lucrativo, na que se permite edificar un volume de 10.500 m2 construídos.
Esta parcela privada poderá albergar distintos usos de carácter privado de tipo asistencial, sociocultural, sanitario, hoteleiro e residencial comunitario.
O concelleiro de Urbanismo, Iago Lestegás, destacou que esta modificación preserva a calidade medioambiental da finca do Espiño e de toda a zona, engadindo que se trata “dun miradoiro excelente sobre a fachada oeste da cidade histórica, que constitúe o perfil máis característico e recoñecible de Compostela” e que ademais conta cunha “contorna ambiental de gran valor, atravesada polo río Sarela e enmarcada polo monte Pedroso” e “perfectamente visible” desde a Alameda, polo que esta actuación se fai sobre este ámbito “co obxectivo de preservar os seus valores ambientais e paisaxísticos”.
Na nova ordenación proposta, ao solo cualificado como PU-FE aplicaráselle a ordenanza do sistema de parques, xardíns urbanos e espazos libres do PXOM (artigo 137), e ao solo cualificado como SC-FE, que inclúe o palacete e os xardíns vinculados a el, cuxo uso previsto é sociocultural compatible con calquera outro dotacional público que o Concello considere de interese, aplicaráselle a ordenanza de equipamentos públicos do PXOM (artigo 136).
Establécense ademais condicións específicas de integración ambiental do conxunto, incluído o mantemento do arborado de interese e, na medida do posible, das trazas dos muros e bancais que definen o relevo do lugar.
Ao respecto da adquisición por parte do Concello dos terreos que considere convenientes, esta poderá facerse a través de calquera dos mecanismos previstos na Lei do Solo, é dicir, a través de convenio coa propiedade, permuta forzosa ou expropiación de terreos.
