O goberno municipal quere tamén aproveitar a sesión extraordinaria para resolver pequenas correccións do cadro de persoal
O goberno municipal de Santiago de Compostela xa ten nas súas mans o informe do secretario sobre a cuestión dos concelleiros expulsados do partido socialista. O secretario esgotou o tempo legal para presentar o documento aínda que a alcaldesa, Goretti Sanmartín, xa adiantara que esta semana estaría rematado.
Desde o goberno aseguran que a vindeira semana celebrarase un pleno extraordinario aínda que non se decidiu o día. O goberno municipal aproveitará a sesión para tratar dous temas máis. O primeiro unhas pequenas correccións no cadro de persoal, necesarias para poder sacar a oferta pública de emprego que hoxe mesmo foi presentada.
Por outra banda levarase tamén a este pleno extraordinario a ordenanza municipal que regulará a taxa turística. Unha ordenanza que foi xa presentada ao sector e que se pretende implementar este verán tal e como avanzara a concelleira responsable Miriam Louzao.
Concelleiros ex socialistas
A situación dos concelleiros expulsados do partido socialista pasará tamén polo pleno aínda que se trata dunha mera cuestión administrativa. O informe do secretario previsiblemente apoiará o paso dos edís ao grupo de non adscritos polo que o grupo socialista quedará formado unicamente por Sindo Guinarte, que será o voceiro, e Marta Abal.
O paso a concelleiros non adscritos ten como consecuencia a perda dos privilexios de grupo político. Non disporán de soldo, nin de asesores. Queda pendente saber si se lles asignará algún espazo no concello para desenvolver as súas actividades, aínda que tampouco é obrigatorio segundo a normativa.
