Compostela, 23 de decembro do 2021 – O pleno de Compostela aprobou por unanimidade distintos acordos entre os que está o apoio ás traballadoras do servizo de axuda no fogar.
Trátase dunha moción conxunta de todos os grupos da corporación na que se indica que “as traballadoras do SAF, que atenden a máis de 25.000 persoas dependentes, levan anos loitando por dar voz ás súas demandas, en concreto á necesidade de renovar o convenio colectivo que non se revisa desde 2009”.
Esta situación provoca unha precarización das condicións deste colectivo que non ten recoñecidos a xornada completa nin o contrato indefinido, nin tampouco conta con axudas técnicas nos domicilios, o que provoca problemas músculo-esqueléticos, de depresión ou ansiedade. Ademais as doenzas derivadas do seu traballo non son consideradas como enfermidades profesionais nin existe a posibilidade de xubilación anticipada.
PXOM
O pleno do concello de Santiago, que comezou cun minuto de silencio polas vítimas de violencia machista, aprobou tamén por unanimidade a modificación puntual do PXOM no ámbito do SUD 9-10, estrada de Vigo-Chouchiños.
A moción incorporou unha emenda transaccional que recollía parte da emenda presentada polo BNG. O texto dese emenda recolle a proposta de “acometer a modificación do PXOM no ámbito do SUD 9-10 estrada de Vigo Chouchiños co obxecto de darlle maior superficie ás parcelas dotacionais previstas que permitan a ampliación do complexo hospitalario, resolver mellor os graves problemas de mobilidade e estacionamento e facer viable o desenvolvemento do planeamento”.
A modificación formulouse de oficio polo Concello de Santiago de Compostela, a través dos Servizos técnicos de Planeamento e Xestión, co obxecto principal de executar a sentenza nº 274/2014 do Tribunal Superior de Xustiza de Galicia. Esta sentenza anula as determinacións do vixente plan xeral no que atinxe á clasificación dos terreos propiedade do recurrente, declarando a súa condición de sólo urbano consolidado, e a súa conseguinte exclusión do sólo urbanizable SUD 9/10. Con esta modificación, tamén se corrixe o trazado do Camiño Portugués incorporado pola Xunta en 2014, distinto do previsto no PXOM e que afecta ao citado sector.
Pacto polo rural
Así mesmo, recibiu o apoio de todos os grupos a proposición do BNG para aplicar as medidas do Pacto polo Rural do Concello de Santiago de Compostela. O edil José Manuel Pichel indicou que se asinará o devandito pacto o antes posible.
Outras mocións
Con maioría suficiente foron tamén aprobadas mocións para buscar solución ao senfogarismo, de apoio ao tren de proximidade ou para a regulación da música ao vivo, todas de Compostela Aberta.
O BNG sacou adiante unha moción sobre accesibilidade na rúa Bispo Teodomiro, a demanda dun pediatra a tempo completo no centro de saúde de Galeras, a ampliación de servizos nos centros educativos, e a mellora da iluminación na rúa do Home Santo e de acceso ao Museo do Pobo Galego.
O Partido Popular conseguiu a aprobación dunha proposta para que non sexa ampliado o aforo dunha discoteca da cidade, melloras nos barrios de San Lourenzo e Carmen de Abaixo, e un estudo sobre o uso gratuíto de comunicacións nas vellas cabinas telefónicas.
