Os concelleiros que seguen dentro do Psoe ausentáronse, os expulsados pediron desculpas polo comportamento dos primeiros e o goberno municipal acabou dando explicacións.
As liortas internas do Psoe de Santiago acabaron protagonizando o pleno de abril en Compostela. Sindo Guinarte e Marta Abal non acudiron ao pleno pero, ao non avisar a ninguén, producíronse momentos de confusión no inicio da sesión.
Os ausentes
Todo comeza porque o pleno non vai tomar en consideración, facer efectiva, o paso dos expulsados ao grupo de non adscritos. O Psoe emitiu un comunicado no que Sindo Guinarte di “coa ausencia desta toma en consideración por parte do pleno das expulsións que se produciron impídese pola vía dos feitos que os únicos representantes lexítimos do Partido Socialista a día de hoxe na corporación poidan tomar posesión dos seus respectivos cargos e actúen como representantes legais perante a corporación municipal de Santiago.”
Guinarte engade que “pola contra, permítese que persoas que foron expulsadas do Partido Socialista sigan falando no seu nome perante o concello de Santiago a todos os efectos, que sigan presentando iniciativas e intervindo como se seguisen sendo a voz socialista no Pazo de Raxoi.”
Rematan asegurando que están valorando todas as medidas legais e xudiciais que poidan tomar.
Os expulsados
Fronte ao comunicado do Psoe os concelleiros, polo momento, do grupo municipal socialista emiten tamén unha nota de prensa na que din que non acudir ao pleno é “Unha decisión que vulnera as súas obrigas como concelleiros desta cidade e que, alén de consideracións políticas, supón unha falta de respecto ás veciñas e veciños ás que temos a enorme honra e responsabilidade de representar”.
Estes concelleiros piden desculpas e engaden que Gonzalo Muíños presentou 48 antes ao secretario as alegacións que consideraba oportunas. Lembran que “non é ningún concelleiro ou concelleira o competente para fixar os prazos dun procedemento de audiencia administrativa” facendo referencia a que só o secretario municipal vixía os prazos do proceso.
O goberno local
En medio de toda esta liorta do Psoe o goberno municipal tivo que acabar por publicar unha aclaración sobre o sucedido e lembrando as datas e as leis que marcaron a situación. Por un lado o goberno explica que “Neste contexto, foi necesario confirmar que o procedemento estaba rematado formalmente para iniciar as mudanzas que atinxen á composición do Pleno” e por outro engade que “Non caben insinuacións de parcialidade cando o que se fixo foi, precisamente, manter a máis estrita imparcialidade. O Goberno municipal lamenta o nivel de tensión xerado entre os diferentes membros da Corporación, que afectou ao normal desenvolvemento do Pleno”.
O pleno
Tras esta liorta o pleno comprobou que tiña quórum e desenvolveuse sen mais problemas. Aprobou de forma inicial, entre outras cousas, a ordenanza de xestión de residuos, que busca mellorar a calidade ambiental e a recollida de 40.000 toneladas ano de residuos. Anormal actual data do 2008.
Tamén se aprobaron por unanimidade unha proposición para desenvolver políticas de envellecemento activo e saudable e tres mocións relativas a melloras nas rúas dos Pexigos, Entrepexigos e Praza de Marcial Villamor; para a reactivación da mesa local de comercio e o establecemento dunha periodicidade mínima de convocatorias; e sobre o retraso na elaboración do Plan municipal de mocidade do concello; todas elas presentada polo grupo municipal do PP .
