Convocan unha reunión para o vindeiro luns co fin de tomar medidas contra o que cualifican como “batallas campais na Zona Nova”.
Os veciños do Ensanche de Compostela veñen de emitir un comunicado no que convocan unha reunión para o vindeiro luns día 13, as oito e media da tarde no Centro Socio Cultural do Ensanche.
Explican que recentemente teñen acontecido “varias batallas campais na Zona Nova a altas horas da madrugada que nos teñén alarmados”. O pasado xoves día 2 de outubro aconteceu unha pelexa multitudinaria no entorno da Praza Roxa e República do Salvador con moitas persoas implicadas que fixo necesaria a intervención de varias patrullas policiais e ambulancias arredor das 6:00 da mañá.
Poucos días despois, o sábado día 4 arredor das 5:00 da mañá, tivo lugar unha segunda pelexa multitudinaria no entorno da rúa Nova de Abaixo ás portas dun coñecido local de ocio nocturno na que se viron implicadas máis de 20 persoas e que obrigou á intervención de varias patrullas e ambulancias con numerosos feridos segundo relatan os veciños.
Unha hora despois, arredor das 6:30 da mañá, tivo lugar unha segunda pelexa multitudinaria no entorno doutro local de ocio nocturno cuxo propietario tamén o é do anterior local. Nesta liorta agrediron a unha muller a cal non presentou denuncias.
Segundo relatan os veciños que estaban presentes, as persoas implicadas ameazáronse con botellas cortadas en plena rúa e a cal non acudiu ningunha patrulla policial.
A Asociación Raigame explica que “presenciamos un día si e outro tamén pelexas en plena rúa arredor de determinados locais de ocio nocturno que nos teñen enormemente preocupados e no que as persoas implicadas ameázanse con navallas. Temos que lembrar que hai 2 anos morreu un persoa ás portas dun destes locais e pouco tempo despois feriron a outra persoa ás portas doutro local en Santiago del estero. Moito nos tememos que calquera día teñamos que lamentar outra desgracia”.
Alertan tamén da presencia de “trapicheo de droga e de determinados pisos e locais de distribución neste entorno que contribúe a aumentar a violencia que se expresa nestas batallas campais nas que incluso se chega a agredir aos propios axentes e a veciños”.
Dende AV Raigame consideran necesario visibilizar estes problemas para que as autoridades competentes poñan solución. Propoñen que dende as Comunidades de Propietarios, actuar contra aqueles pisos e locais que alteren a convivencia. Dende o Concello, non autorizar máis licenzas de discotecas e afters en zonas residenciais e adiantar o horario de peche ás 4:00 da mañá.
Dende o Consello de Relacións Veciñais canalizar as demandas xunto con outras asociacións veciñais cos mesmos problemas como acontece na Zona Histórica ou en San Lourenzo.
