Compostela, 5 de febreiro do 2025 – A rúa das Rodas terá nuns meses un paso de peóns que facilite o acceso á escola infantil da Galiña Azul que se atopa chegando a San Roque.
Os pais dos cativos hai tempo que pedían solucións xa que para cruzar de xeito seguro tiñas que bordear as Rodas, subindo ata San Roque, para volver a baixar pola outra man.
A actuación na que traba lla o concello, aprobada xa en Xunta de Goberno, consistirá na construción dun paso elevado de peóns que unirá a zona vella, desde a praciña da Algalia de Arriba ata a escola infantil.
O concelleiro de Vías e Obras, Xesús Domínguez, detallou que o proxecto das Rodas “responde á escoita activa dos sectores implicados, os pais e nais, e da ANPA desta escola infantil que hai anos viñan demandando un paso seguro”.
O concelleiro explicou que esta actuación consistirá na construción dun “paso de peóns elevado con plataforma única onde se vai recuperar a cota das beirarrúas, creando unha zona de preferencia peonil”, así como na mellora das instalacións da rede de pluviais, cun soterramento da nova recollida de augas baixo o novo paso, e na renovación do mobiliario urbano na entrada da escola.
Segundo o edil, esta actuación permitirá “aumentar a seguridade, dar preferencia aos peóns, facendo que os vehículos teñan que ir cunha velocidade máis pausada” pola rúa das rodas.
Esta actuación, que contará con 66.209,99 euros de orzamento e un prazo de execución de tres meses, “é totalmente coherente e compatible coa filosofía do conector central e vaise executar de forma coordinada entre todos os departamentos”, detallou.
Ademais, como indicou Xesús Domínguez, esta intervención súmase a outras deste tipo “como a que se vai levar a cabo na rúa dos Loureiros, na que tamén se fará un paso de peóns elevado que vai facilitar e garantir a seguridade do paso escolar entre as escaleira de San Roque e a ruela da Estila”.
