Compostela, 20 de maio do 2020 – O Grupo Municipal Popular, a través da concelleira Ana Sabel, pedirá ao Goberno de Sánchez Bugallo que faga as xestións necesarias co fin de impulsar a colocación da fibra óptica na zona rural da cidade.
Para os Populares, é de máxima prioridade o impulso da fibra óptica no ámbito rural do Concello, polo que consideran que o Grupo de Goberno debe intensificar as conversas e negociacións coas distintas empresas e administracións. Piden que se destinen os recursos municipais que sexan posibles, para avanzar na conectividade e “lograr, canto antes, a extensión da rede internet para o acceso a servizos telemáticos ao conxunto da veciñanza do municipio”.
Os populares explican que esta necesidade resulta cada paso máis urxente, tan e como o reflectía o documento da Federación de Asociacións Veciñais do Rural de Santiago (FERUSA), que lle outorgaba un “carácter inmediato” a esta acción, entre a trintena de medidas que se consideraban prioritarias.
A carencia de fibra óptica no rural veuse subliñada pola actual crise do Coronavirus. Unha necesidade evidente cando se está a falar da conveniencia de longas estancias domiciliarias, co que iso supón para o normal desenvolvemento de distintas actividades e xestións, no terreo da educación, a sanidade, a oferta e demanda de bens e servizos ou o fomento do teletraballo.
O PP engade que se trata dunha medida complexa na que deben participar as distintas administracións públicas, sobre todo, o Ministerio de Industria e a AMTEGA, tendo en conta que, con carácter xeral, xa que para as empresas subministradoras a extensión da rede no ámbito rural non resulta rendible.
