Despois do éxito do décimo aniversario os organizadores da Maker Faire repiten en Área Central, o lugar no que naceu a feira. Falamos con Enrique Saavedra, un dos fundadores.
Hai once anos, cando Lindeiros aínda se publicaba en papel, a xente de Vermislab organizaban en Área Central a primeira Maker Faire. Un evento que sorprendeu por mostrar tecnoloxías que tiñan desde o inicio aplicacións prácticas e inventos que cos anos significaron avances en moitos eidos distintos.
A Maker Faire creceu ano a ano, recolleu apoios, organizouse na Cidade da Cultura durante un tempo e o ano pasado volveu a Área Central pero como a primeira xornada dun programa moito máis completo. En outubro e novembro outras dúas xornadas céntrase en aspectos máis profesionais deixando a primeira para a parte máis ludica.
En este 2025 manteñen ese esquema e quixemos falar con Enrique Saavedra, un dos fundadores, sobre a súa valoración de estes anos e todo o que está por chegar. Comezamos precisamente por ese decimo aniversario celebrado no 2024.
O cambio dunha Maker Faire en tres xornadas continuadas a unha separada en tres momentos do distintos foi unha estratexia de cara a darlle máis relevancia a cada unha das partes da feira; a exhibición ten o seu espazo pero tamén o emprendemento ou a formación tal e como nos conta Enrique.
A Maker Faire é sempre unha mestura de proxectos interesantes de distintas áreas da sociedade. Atoparemos desde proxectos sociais ata emprendedores que non pasan dos catorce anos. A filosofía de esta primeira xornada é “que a xente veña a facer”.
Nunha entrevista sobre un evento como a Maker Faire é imposible non preguntar pola intelixencia artificial. Os makers, como en moitas ocasións, chegaron antes. Enrique cóntanos que levan 7 anos traballando con IA, antes de que ninguén falara dela.
Ante as dúbidas que xorden arredor da intelixencia artificial Enrique o ten claro: non podemos competir con ela, hai que usala como unha ferramenta. Unha ferramenta que permite que xente con menos recursos compita coa que ten moitos máis, serve en certo modo de igualadora de oportunidades.
Este sábado, en Área Central desde as dez da mañá, teremos a oportunidade de probar e desfrutar das últimas ideas dos makers. Algunhas divertidas, outras útiles, todas interesantes. Non deixedes de pasar porque a Maker Faire fai madurar aos nenos pero o mellor é que aos que somos maiores devólvenos a ilusión da infancia.
