Compostela, 14 de setembro do 2023 – Un ano máis o conxunto de Cidades Patrimonio da Humanidade de España celebra a Noite do Patrimonio para poñer en valor todo o que atesouramos.
Un ano máis a Noite do Patrimonio ofrecerá este sábado un amplo conxunto de actividades encamiñadas a por en valor a arquitectura da cidade. Este evento desenvolverase de xeito simultáneo nas 15 vilas que forman parte do Grupo de Cidades Patrimonio da Humanidade de España, entre as que se atopa Compostela.
A concelleira de Capital Cultural, Míriam Louzao, presentou a programación vinculada á Noite do Patrimonio, acompañada da deputada provincial de Cultura, Natividad González, e de Manuel Rial de Trivium, a entidade organizadora.
Patrimonio C
Míriam Louzao salientou que con esta nova edición da Noite do Patrimonio, “o Concello pon en marcha unha nova liña estratéxica dentro do Departamento de Cultura, á que chamamos Patrimonio C”, que ten a intención de “poñer en valor o patrimonio de Santiago desde unha perspectiva ampla, en construción e sempre participada pola cidadanía”.
O obxectivo é “reafirmar o sentido de pertenza” da cidadanía, aumentando o seu coñecemento sobre o patrimonio e “resignificar espazos da cidade que teñen un uso turístico elevado” para que os composteláns e compostelás “volvan tomalos como propios”, detallou a concelleira.
Programación
As actividades enmárcanse este ano en tres liñas: ‘Patrimonio ao Vivo’ con actuacións musicais e un obradoiro de baile tradicional; ‘Patrimonio Aberto’, que inclúe roteiros e visitas ao interior do Pazo de Raxoi e no antigo Concello – ZONA C; e ‘Patrimonio Agora’, para achegarse á arte contemporánea a través de visitas guiadas en varias galerías, e obradoiros de artesanía impartidos por Susi Gesto ou José Castro, entre outros.
A actuación que abrirá a noite será a obra de danza ‘Pièce distinguée nº59’ de La Ribot Ensemble, ás 20.30 horas ao carón do Museo do Pobo Galego. É unha proposta na que a parella de artistas completamente cubertos de ouro reflicte os derradeiros raios do sol antes do solpor. Esta peza de danza xoga cos múltiples significados do ouro, nun ritual á vez luxoso e primitivo. Este espectáculo será retransmitido por streaming a través da web: lanochedelpatrimonio.com e na web e redes sociais da UNESCO.
Todas as actividades son gratuítas. Pode consultarse a programación completa na web
Dos tres itinerarios destacamos o paseo guiado aos barrios extramuros, Bonaval, San Pedro, Belvís e Sar; a partir das nove da noite e que durará arredor dunha hora.
A partir das nove e medio o fotógrafo Manuel Blanco fará outro roteiro no que mostrará unha serie de espazos que desde a súa visión teñen un carácter fotoxénico.
Tanto a actual Casa do Concello, o Pazo de Raxoi, como a antiga, a Zona C en Cervantes, realizarán visitas guiadas desde as nove as once e media, entrando grupos cada media hora. Por outra banda as distintas galerías de arte da cidade estarán abertas mostrando as súas diversas mostras.
A Noite nas Cidades
La Noche del Patrimonio. A Nit do Patrimoni. A Noite do Patrimonio celebrase nas 15 Cidades Patrimonio da Humanidade de España, unha cita histórica que coincide coa celebración do 30 aniversario da creación do Grupo e coa Presidencia de España do Consello da Unión Europea.
Trátase dun evento cultural único en Europa, organizada polo GCPHE cun programa de eventos e actividades que se desenvolverán de forma simultánea nas 15 cidades históricas co selo UNESCO e inclúe a apertura extraordinaria de monumentos ou museos e 300 actividades gratuítas para todos os públicos. Ademais, ofrécense 15 espectáculos de danza contemporánea no marco do Festival Escena Patrimonio, con sete estreas absolutas.
