Compostela, 12 de decembro do 2024 – Durante todo o ano actúan en distintos momentos pero un dos máis clásicos é o Nadal, os concertos das corais son desde hai anos parte das celebracións de estas datas.
O ciclo de corais leva por título “Cantan o Nadal” e inclúe unha oferta moi diversa en canto a estilos. Constará de cinco concertos, con dúas agrupacións por actuación e desenvolveranse en espazos de socialización veciñal dos barrios e parroquias do municipio desde o 14 ata o 27 de decembro.
Unha programación que comezará este mesmo sábado na igrexa da Mercé de Conxo, coa Coral Crecente de voces graves e a Coral de habaneras da Rocha Forte, e pasará por varios espazos da cidade. Todos os concertos terán lugar ás 19:30 horas.
A seguinte cita será o domingo 15 no local cívico de Aríns coa Coral Santa Susana e a Coral Coto da Nai. O sábado 21 o programa chega ao CSC de Vite co concerto da Coral Voces de Compostela e a Coral Ponte Mantible.
Os dous últimos concertos de “Cantan o Nadal” serán o domingo 22 na Igrexa do Castiñeiriño, co concerto de La Salle coral polifónica e a Coral Amigos do Castiñeiriño; e o venres 27 no CSC das Fontiñas, coa Coral Solfa e Obradoiro de Voces Libredón.
Unha oportunidade de achegarse á música coral e ás corais que ao longo de todo o ano traballan e ensaian para poñer música a distintos momentos da cidade como agora no Nadal.
