Compostela, 15 de decembro do 2024 – O Nadal de Compostela ten este ano un participante inesperado. O neno de madeira que mudo en real, Pinocho, visitará Santiago.
O Circo de Pinocho é un espectáculo de Educateatro Producións, qie visitará o Nadal de Compostela do 20 de decembro ao 4 de xaneiro ofrecendo 17 funcións. Estará instalado no parque das Cancelas e as entradas que xa están á venda na web circodepinocho.gal por prezos que van desde os 11 euros.
A concelleira de Dereitos e Servizos Sociais, Promoción Económica e Xuventude, María Rozas, presentou hai unha semana a montaxe nunha rolda de prensa na que estivo acompañada polo productor, Xandre Vázquez, e por Pepiño Grilo e Pinocho, dous dos protagonistas desta innovadora proposta escénica para este Nadal.
O Circo do Pinocho é unha montaxe que combina o teatro musical cunha escolma dos números máis clásicos do circo, nunha carpa deseñada especificamente para este espectáculo no que aparecen personaxes do clásico conto infantil.
A Concellaría de Dereitos e Servizos Sociais, Promoción Económica e Xuventude vai repartir máis de 300 entradas de balde, parte delas para familias vulnerables usuarias dos Servizos Sociais, e outra parte a través do departamento de Comercio, na ruleta “Eu Merco Aquí” que estará instalada durante o Nadal na carpa da Praza Roxa e na Alameda.
Xandre Vázquez explicou que o “Circo de Pinocho” é “unha proposta de circo clásico pero modernizado, e ademais é a día de hoxe a única proposta de circo galego, con artistas que ademais son na súa maioría residentes en Santiago”.
María Rozas aproveitou para dar conta tamén doutras accións que fan parte da programación de Nadal, organizadas desde a Concellaría de Dereitos e Servizos Sociais, Promoción Económica e Xuventude.
A tenenta de alcaldesa lembrou que “o departamento de Comercio volve apostar por actividades de dinamización, que anime á veciñanza a sair á rúa e, polo tanto, a achegarse ao pequeno comercio, para o que esta época do ano é fundamental”. Ao igual que o ano pasado, a programación centralizarase nas carpas que se van instalar na Praza Roxa e na Alameda.
